Ajininsa yake 2-01
Posted by ANaM Dorayi on 11:39 PM, 11-Nov-15
Under: Ajininsa yake
_______ NA ZULAIHAT SANI KAGARA_______
.
.Gaba daya tsarguwa ta kama shi, dole ya sake
kallonta, ya kirkiro murmushin karfin hali yace "
an dawo lafiya? tace "lafiya lau" shiru ya sake yi
yana tunanin me kuma zai sake cewa? ji yayi tace
" Ya wasan Polo? ya dan dube ta ya amsa, "
muna dan tabawa." Abba ya ce yayi sabon Jah-
Jah, shine ya-ce har Yakubu ya tsufa ne? yayi
dan Murmushi yace ai komai lokaci ne, mu ma
wata rana daina yayin mu za'a yi." ta ce "Gaskiya
ne. To ya antin tawa? Ya amsa "Tana gaishe ki."
"Ina amssawa." Tayi shiru kamar yadda shima bai
kara cewa komai ba. Wayar sa ta hau ruri, ya
jawo ta ya duba. Nan da nan ya dauka, "Hurul
aini." Da sauri ta daga ido ta dube shi yayin da
ya ci gaba da fadi" An dawo school din ne? Ta ce
na dawo, to yaya? Ya-ce "Muna tare da ita." "Ban
yarda ba". Ya ce kin san ba zan miki karya ba. Shi
yasa ma tun jiyan na kira ki na gaya miki." Ta ce
in da gaske ne, ban ita mu gaisa.' Kai tsaye ya
dubi Nusaiba, ko dama shi take kallo, kuma sai
taji kamar kishi zai kamata. Mika mata wayan
yayi ya ce "ga Zarah." Tana yar fara'a ta
amsa,............ Tayi mata sallama, haka kawai ita
ma taji kishin ya dirar mata, Ta daure ta amsa
sallamar, Nusaiba tace 'Ya school? Ta amsa,
"Lafiya lau, Kin ga Maigidan namu ko? Tayi dan
Murmushi, Ta ce "Na gan shi" Ta ce Zaki sha
surutu har sai kin gaji, ta dan saci kallonsa, don
ita bata ji surutun ba, Hankalinshi bashi kanta,
shi dayar wayar ma yake faman latsawa, tana
kallonsa ta ce "Yarima kam bakunta na
damunsa." Shi yasa ya dubeta ya tabbatar da shi
su ke, Ta janye idonta a hankali, tana mai
bayyanar da murmushi. Shi kuwa takaici ne ya
tokare wuyansa. " Wane shisshigi kuma Zarah ke
yi? ya tambayi kansa, wani asirtaccen tsaki yayi,
ya dauke kai, Nusaiba da Zarah kam hira ce ke
neman gocewa, basu ma san lokacin da
zukatansu suka saba da juna ba, kawai ji suke
sun amince da juna har suna dokin ganin junan
su.Domin a halin yanzu Nusaiba ke fadin,"To
yaushe za ki zo? Kodayake ni ce k'arama, ni ya
kamata in fara zuwa." Zarah ta ce,"Yanzu na ji
magana, to yaushe za ki zo? Ta ce,"Ki saurare ni
zuwa karshen satin nan, ki turo min lambarki, ni
ma zan turo tawa." Ta amsa, "O.K, zan turo miki.
Bari in bar ki da ogan, kar in yi laifi." Tana
dariya, ta ce,"Tsaya in mika masa ku yi sallama."
Haushi Zarah ta ba shi, don haka tana mika
masa wayar, ya kashe, ya zira ta gaban aljihu.
Kashewa tayi?" Ta tambaya. Ya ce,"Uhm......... Ta
ce,"Anti na kenan. Da ji za ta yi kirki." Ya ce
,"Sosai take da kirki kuma tana da halaye masu
yawa wadanda kullum suke kara min son ta.
Iyayen ta talakawa ne iri na. Sai dai Allah yayi
mata baiwar da bai yi wa kowane mahaluki ba.
ZARAH, sunanta kadai ya kan sanya ni nishadi,
ballantana ita kan ta. Kar fa ki ji wani abu a rai,
ba wai ina fad'i bane, saboda wata manufa. No,
ina son ki sani ne, ba kowace mace zata yi abin
da Zarah tayi ba. Tun muna yara mu ke tare, sai
da biki ya zo gaf, sannan aka ce ga wata a hada
2, ina nufin kishiya, ko ke ce yaya za ki ji? Gaba
daya jikin ta yayi la'asar, ba don komai ba, sai
don tausayin Zarah d maganganun Naseer suka
sanya ta. A take nan ta ji kaunar Zarah na shiga
jikin ta. Tabbas Zarah tayi bajinta, kuma abar
tafa mata ce. Ta sauke numfashi. "Gaskiya ne, ko
ni ta burge ni, sannan bayanin ka a yanzu ya
sanya min kaunar ta cikin raina. Hakuri babban
Jari ne, kuma ita rayuwar duniya mai karewa ce,
shi yasa ni ma ban ga dalilin daukan ta da zafi
ba. Tsakanin mai kudi da talaka kuwa, wata
hikima ce irin ta Ubangiji. Ya kuma halicce mu ne
saboda mu taimakawa junan mu. Da ya so, da
gaba daya masu kudi zai hallice mu. Haka ku ma
daya ga dama, da sai ya aje mu dukkanmu a
talakawa. Mai hankali idan ya natsu, zai gane
dimbin dalilan da su ka sa Ubangiji ya bambance
ababen halitarsa. Saboda haka kar ka yi tunanin
komai akan zama na tare da Zaraha, wai don ni
na fito gidan wadata. Insha-Allahu za ka same ni
da irin halayen da ka ke so." Yayi dan shiru,
tunanin sa Nusaiba na da kalamai, sai dai ba su
wani girgiza shi ba, saboda ya saba jin kyawawan
lafuza a wajen Zarar sa A takaice ma dai ji yayi
kamar tana son tayi gasa da Zarah, don ya ce ta
ji yana yabon ta. Ya girgiza kai, ya ce,"Shi kenan."
Ya duba agogon hannunsa, ya ci gaba,"Bari mu yi
sallah ko? Karfe daya ta gota." Yana rufe baki,
ana kwala kiran sallah. Ta mike ta ce,"Za ku shiga
masallaci ne? Ya ce,"Sosai kuwa." Ta fice ta bar
shi yana zancan zuci, "Ka ji 'ya da a dakin ki za
mu yi sallar? Ya dan ja tsaki, sannan shi ma ya
fita ta kofar da suka shigo. Ita kuwa wajen Sageer
ta nufa, ta kira shi ya fito, ya iske Naseer a waje,
suka tafi masallaci. Nusaiba na sallamewa sallar.
Wayar ta ke ruri? Ta dauko ta, ta duba Kausar
ce, ta dauka tasa wa kunnen ta,"Ban son
wulakanci, ba za ki zo din bane? Ta ce,"Gaskiya
zai yi wuya. Wallahi lakcas sun yi yawa yau. Ko
wacce kuma na da muhinmanci da sai in tsero.
Sorryy kwata, ki ce da Jah-Jah gaisuwa na ke.:"
Ta dan ta6e baki, ta ce,"Ban fad'i." "Ai na ce
sorry. Ke ma kin san sbd karatu ne kawai.." Ta
ce,"Shi kenan, ni zan zo gobe, idan kin dawo ki
kira ni." "O.K Matar Jah-Jah. Tana murmushi ta
ce,"Kya ji da shi." Suka yi sallama. Kowa ya aje
waya.
Madubi ta nufa ta sake gyara fuskarta da daurin
dan kwalinta, ta suri waya ta bar dakin. Mariya
ta kira, ta tambaye ta maganar abinci, ta ce duk
ta shirya su a can falon. Kai tsaye can ta wuce.
Takalman su Naseer na kofar falon, don haka ta
shiga da sallama. Duk suka amsa. Kai tsaye wajen
abinci ta wuce ta bubbude kulolin, ta ce kowa ya
bi abinda yake so. Sageer ta za6i Frie rice, shi
kuwa dan gogon da kyar ya cusa lafiyyan
(Coleslaw). Sun dan ta6a hira zuwa karfe 3,
Naseer ya ce tafiya za su yi. Sageer ya ba su wuri
su yi sallama. Tsawon minti 2, bai ce da ita komai
ba, sai ta mike ta ce bari ta kawo masa sakon
Zarah. Shi ma ya tashi ya ce ta same shi a mota.
Suna tsaye jikin mota, ta fito da manyan
jakunkunan leda guda 2, cike suke da kayan
shafe-shafen mata. Ta mika wa Sageer ta
ce,"Leda 1 Zarah, 1 ta amaryar ka, don ni ban
yarda ba da ka ce babu ita. Dariya yake yana
fadin me zan 6oye miki? Kin san Allah babu ita a
halin yanzu sai an kammala karatu. Kin san taura
2 basa taunuwa a lokaci guda." Ta ce,"Gaskiya ne,
to mun gode, amma ki rike wannan, tunda dai
yanzu babu ita." Ta ce,"To lodawa Antina duka."
Ya ce,"Lallai Zarah ta gode. Allah ya saka da
alkhairi." Naseer ya dube ta tsakar ido, ya
ce,"Kayan nan sun yi yawa da kin rage." Ta dan
kada kai, ta ce,"Ba su yi ba, kuma ai Antina na ce
akai ma wa ko? Ya ce,"Shi kenan ta gode. Sai
wani lokaci." Ta ce,"Ni ma na gode, a gaida kowa
da kowa. Za su ji." Ya fadi yana shiga mota. Tuni
Sageer ke mazaunin direba. Ya tada mota. Mai
gadi ya bude get, suka fice, sannan ta wuce
gida." A falon sama ta iske Umminta. Gefen ta, ta
zauna ta ce "Wash! Na gaji." Aikin me ki ka yi? Ta
ce,"Haka kawai na ke jin kasala." Sun tafi ne?
"Eh, sun tafi yanzu." Ta dan yi shiru, kafin ta ce,"
O.k." Ta dan dafa kan ta." Ko dai yunwa ki ke ji?
Fuska yamutse ta amsa. "Wallahi kuwa. Don ko
dan ruwa ban kurba ba." Ta ce,"To maza tashi ki
je ki sami abinda za ki ci." Ta mike ta wuce, tana
jan takalma, da gani ta gajin da gaske. Umminta
tayi kasake, tana tunanin ya dace ace Naseer ya
shigo ya gaishe ta. Da ta rasa dalili, sai ta watsar
da zancan, ta kama abinda ke gaban ta.
Sageer ya ja na dogon salati. Da sauri ya dube
shi, "Menene? Ya ce," Zuwan duk bai da amfani."
Da aka yi me? Ya ce,"Ka san tamkar a kan kaya
na ke zaune cikin gidan nan, maimakon ka ce
min mu je mu gaida Hajiya....... Shi ma salatin ya
dauka ya dire,"Girman Allah na mance, abinka
da ba sabun ba. Gaskiya ba'a kyauta ba. Kuma
anyi abin kunya. Yanzu ka kira wayar Nusaiba, ka
ce ta ba Hajiya hakuri, mantawa mu ka yi. Ai
kowa yasan ajizani na Dan-Adam." Naseer ya ja
tsaki,"Zancan banza. Ni ina da lambar ta ne? Ba
ka amsa ba? Ya tambaya a firgice. Wani tsakin ya
sake yi. Sageer ya hau fada.Ka na ta tsaki,
wannan ai wulakanci ne, ka ma nuna zahiri ba ka
damu da ita ba, ai ko da ba'a sai ka ce ta ba ka
lambarta, tunda dama can zuwan ba don Allah ka
yi shi ba! Amma wannan rashin mutuncin da me
yayi kama? Ya balla masa harara, ya ce,"Don
Allah ya ishe ka Malam. Ka fi ni jin zafin abin ne?
Saboda me zan ki gaishe da Hajiya? Bayan
kodayaushe na je gun Alhj, zan shiga wajen ta
mu gaisa. Kawai mantawa na yi." Ya ce,"Ai
saboda rashin daukan wannan zuwan da
muhanimanci, duk shi ya kawo hakan." Eh, kai
haka din ne, sai me? Kai da ka dauka da
muhinmanci me yasa ba ka ce aje a gaishe ta
ba? Yayi shiru ya ci gaba da kallon gaban sa.
"Mts.......... Naseer yayi tsaki. Ka fein ya ce
"Wallahi da gangan ka ke ba ni laifi. Ya dan dube
shi, ya sassauta murya,"Yanzu saboda Allah
Naseer ina abin kushewa a wajen yarinyar nan?
Ya gyara zama sosai, ya ce,"Ni ka ji na kushe ta
ne? Nusaiba tayi. Wallahi babu gatse a cikin
magana ta, duk inda ake son mace, yarinyar nan
ta kai wajen kuma har ga Allah ta wuce da aji na
da ace haka kawai na gan ta a titi, babu yadda
za'ayi in tunkare ta da maganar soyayya, saboda
ba aji na bace. Saboda haka na ke son ka gane.
Allah bai sa min son ta ba ne. To wa ya isa ya
sanya min? Shi fa so gamuwar jini ne, kuma
mu2m ya kan ji shi ne kawai cikin ran sa. Ka san
Allah, har mu ka bar wajen nan, babu komai
cikin raina, sai k'unci, to ina son yake anan?
Sageer ya numfasa, tausayinsa ne ya kama shi,
wannan murdaddan al'amari da me yayi kama?
Ya kara kwantar da murya ya ce,"Sarai na
fahimce ka Naseer, amma shawarar da zan ba
ka, ita ce ka rinka yaki da zuciyar ka. Kullum ka
rinka nuna mata rayuwa na iya sauyawa a
kodayaushe. Domin ba ka san abinda Allah ya
6oye a cikin wannan aure ba. Please! Ni rikon ka
na ke? Ya mirgina kai gefe, ya ce, "Na ji." Aiki da
shi ba dole ba kenan? Ya dube shi ido
warwaje,"Yau na ga ikon Allah! Abinda fa ke hada
ni da kai kenan. Kai komai ayi shi dole. Na ce na
ji, sai ka bar shi a anan jin. Shine za ka bude min
ido? Ya juya yana guntun murmushi, "Kai kai,
Sageer Tela kenan.!."Allah yasa su Baba su samo
maka mata a kauye." To menene? Ya ce, "Ba
komai. Har na hango mu ne mun je tadi, ta ci
uban jan baki da gaxar ga uwar dammara." Yayi
'yar dariya, ya ce,"Duk babu komai, a hankali zan
canza ta. Kai ba ma za ka ta6a gane ta ba, idan
ta waye." Ya jingina da kujera ido rufe, yana
fad'in ,"Ya Allah ka amsa. Allahumma amin."
Sageer ya ce,"Please stop that nonsense, ba
shine a gaban mu ba. Ka yi kokari ka kar6i
lambar Nusaiba, ka wanke kan ka." Ya bude ido
yana duban sa a karkace, bai ce komai ba, haka
shi ma Sageer bai k'ara cewa uffan ba.
¤¤¤¤¤¤¤¤¤¤¤¤¤
Ba k'aramin farin ciki Umma tayi ba, lkcn da su
Naseer suka dawo. Shi da kansa yake gaya mata
irin kayayyakin da Nusaiban ta bayar a kawo wa
Zarah." Ba ta ma rude ba, sai da Sageer ke gaya
mata kyautar gida da sabuwar mota inji Alhj." Ta
tallafe ha6a ta ce,"Dole mu je Kaduna godiya,
bari Malam ya dawo. Oh ni 'ya su. Allah ka k'ara
had'a mu da masoyan mu." Ganin Umma na ta
murna tana k'ara masa takaici, shi yasa ya ce zai
k'arasa gidan su Zarah ya kai ma ta sakon ta.
Sageer ya sallame ta, suka fito tana ta sa
albarka. Gida ya fara aje shi, sannan ya juya
akalar motar sa zuwa gidan su Zarah!.Yana tafe
zuciya na masa saka iri-iri, tana aibanta masa
auran Nusaiba. Tana nuna masa Zarah fa kallon
sa kawai take yi. Allah kadai ya san abinda ke
cikin ran sa. Watakila ma yana so gulma ce
kawai. Nan da nan ran sa ya shiga kuna da
kiyayyar Nusaiba ta tokare masa zuciya. Dole ya
taka birki ya kashe mota, ya jingina da kujera ya
runtse ido ya na kiran, "Inna-lillahi"Wa-Inna-
ilaihir-raji'un! A zahiri ya nuna masifa ce babba
ta same shi, domin anyi masa dabaibayi ta
k'oina, an daure shi da jijjiyoyin jikin sa. Tasbihin
da yake wa Allah, shi ya taimake shi zuciyarsa ta
sassauto ta daina bugawa. Ya bude ido jajur! Ya
numfasa, sannan yayi hucin zafi. Ya kada kai,
yayin da yake tayar da mota. A haka dai ya
lalla6o kofar gidan su Zarah. Nan ma ya jima
zaune kafin ya dauko sakon ta ya fito, ya kulle
mota ya shige gidan. (DUHUN KAI, GABA DA
KISHIYA).Shine sunan littafin da Zarah ke
karantawa a tsakar gida, wanda Ustaz Abubuakar
Abbas Rjiyar Lemu ya rubuta. Sallamar Naseer
yasa ta cira kai, ta dube shi tana amsawa tare da
wani kayataccan murmushi. "'Yan Kaduna. Har ka
yi me? Take zuciyar sa ta wadata da farin ciki.
Amma fuskar sa, ba walwala sosai, ya zube ledoji
gabanta ya ce,"Na dawo. Ina Inna?"Ta ce,"Bata
dan jin dadi ne, shine ta kwanta, ina jin ma barci
ne ya kwasheta." "Ya ce, "Assha-assha, ta sha
magani? Ta sha. To ya hanya, ya aka baro
amarya? Ya kara kirne fuska ya ce, "Tana gaishe
ki. Wannan kayan ma sakon ki ne, wai a kawo
miki." Ya wuce dauko kujera, ya bar ta nan tana
bubbude ledojin. Ta wangame baki cike da
mamaki, ta dube shi yayin da yake zaune bisa
kujerar yana fuskantar ta, ta ce,"Wadannan kaya,
yayana ai sun yi yawa." Ya ce." Ah to, ai dole a
baki kaya da yawa, tunda an cuce ki. Abin ba
siyasa ba ce." Ta dan daure fuska, ta ce "An cuce
ni fa ka ce? Haba yayana bai kamata ka fadi haka
ba, ina laifin mai son ka? Ya ce,"Babu ai ke ba za
ki gane wayon ba. Wai ni ma ina zuwa Alhjn ke
gaya min zai ban gida a Hanwa da sabuwar mota.
Duk kallon su na ke, me ya sa da can bai ba ni
ba? Kin ga ya nuna min ginin da na daddage na
yi, ya raina shi kenan. Saboda haka ki karbi duk
abinda su ka ba ki, ki ci banza, ni Naseer na ki
ne har abada, ruwa da iska, babu mai raba mu,
balle karfin dukiya. Tayi zuru tallafe da ha6a,
tana kallon sa ya kai aya. Idanuwan ta suka dan
jirkita, na rashin jin dadin maganan. Ta dan kada
kai, ta ce,"N kuwa yayana ban ta6a zaton ka na
da irin wannan tunanin ba akan mutane. Zato?
Zunubi ne ko ya tabbata gaskiya inji Manzon
Allah (S.W.A). Saboda haka na ke shawarta ka, da
ka daina wannan zargin a ran ka. Komai za ka yi,
ka yi shi don Allah, hakan shine cikar mummuni.
Na san ka na kaunata............Yayana ni ma kuma
ina tare da kai." Ya sauke numfashi ya ce,"Ba
kaunar ki kawai na ke yi ba, son ki na ke mai
tsanani, irin wanda ban jin sa ga ko wace 'ya
mace. Na je Kaduna na ga Nusaiba kuma ina mai
tabbatar miki bata da makusa, amma ko alama
ban jin son ta cikin raina ba. Na san ba dole bane
ki yarda da abinda na ke fada, sai dai ya zama
dole in gaya miki, anyi min fin karfi. Anyi min
tilas, ancusa ra'ayin da har abada ba shi cikin
tsari na. Gaba daya an rusa ginin da na tsara
zuciya ta, wanda bai wuce son da na ke miki ba,
in zauna da ke cikin gidan da wasu ke rainawa.
Saboda haka kar ki ga laifi na akan duk abinda
na fadi, bacin rai ne." Ta ce,"Duk na ji, kuma na
tabbata idan za mu kwana anan, ba zan ta6a
kada kai ba, don ka fi ni baki. Amma ina son in
roke ka arziki, saboda girman Allah, ka yi min
alkawari za ka rike ni da Nusaiba a matsayin 'yan
uwa daya a muslunci? Shiru yayi, yana kallon ta
sama da kasa. Ta sake fadin,"Yayana........."Kar ki
hada ni da addini. Ki tauye ni Malama! Yayi
saurin taran numfashin ta, don haka ta bi shi da
kallo." Gaskiya na fada, kin san na fi ki sanin 'yar
uwa ta ce a muslunci. Ubangiji kuma duk ya fi
mu sani, shi yake sanya kauna da soyayya, to bai
sa min ta, sai yaya? Ta dan yi jim! Tana masa
kallon mmk kafin ta k'ara kwantar da murya ta
ce,"Ni kuwa yayana ganin na ke duk zance ka ke
yi, a hankali za ka so ta." To fa! Ta tsokano
tsuliyar dodo. Mintoci barkatai ya kwashe yana
kallonta kawai, da gani, ta san ta ta6o shi, don
haka ta sunkuyar da kai ta sake fadin,"Allah ya
huci zuciya yayana." Ji tayi kawai ya shura
takalman sa, ya wuce. Ta bi shi da kallo har ya
fice. Ta kama baki tana sallami,"Yayana kamar
kuturu? Nan da nan zuciya iya wuya. Dama ya
lafiyar kura? Da anyi magana, ya tashi yayi waje,
ai za mu sha fama, gara in sami mai taya ni." Ta
shiga fiddo kaya daga leda, kaya ne 'yan waje. In
banda setin kayan Nivea da Naseer ke siyo mata,
babu wanda ta ta6a gani cikin su. Turare kam sai
ta gaji da fesawa.
¤¤¤¤¤¤¤¤¤¤¤¤¤¤¤ Nusaiba kwance bisa gadon ta
shiru, ta rasa abin da take tunani. Ta dubi agogo
karfe 5 daidai, nan da nan tayi tunanin yakamata
ta tambayi su Naseer, ya suka isa gida? A lokacin
guda wani sakon ya sake zuwa kwalkwarta, Ashe,
ba mu yi musayar lamba ba. Tayi wuf, ta tashi
zaune,"Yaya aka yi haka? Ta tambayi kan ta. Abin
ya bata mamaki kwarai, saboda shi ya bata
lambar Zarah, tayi amfani da ita ta aika mata da
ta ta lambar. Ta kada kai tana dan murmushi,
kafin ta ce,"Ban ma san wanda ya fi shirme ba
tsakanin ni da shi." Wayar ta dauka gefen filo ta
nemo Zarah. Wayar na jikin ta a lokacin da take
ta ba ido abinci, ta shafa wancan mai, ta goge
(Lotion) ta fesa turare. Kukan Wayar ta ji a jikinta,
ta daga da sauri ta dauka, ta dubi lamba. Nan da
nan ta dauka, " Hello! Hello Antina." Ta
ce,"Wallahi ban so ki ka kira wayar nan ba yanzu,
domin na baza sakon ki ne ina ta gani, jira na ke
in gama, sannan in kira, in yi godiya." Tayi dan
murmushi ta ce,"Antina kenan ashe har sun iso?
Ai kuwa sun dawo tun dazu, yanzun nan ogan ya
bar nan. Ta ce,"Ba ki san wani abu ba. Ashe ba
mu amshi lambar juna ba, ni ban tuna ba, sai
yanzu da na ke son inji yaya suka je gida? Shi
yasa ma na kira ki, ki ba ni lambar in masa gori."
Mamaki ya kashe ta, ta ce,"Ta6d'i, ai kuwa
abinda ya fi gori ma ki yi masa, ni ma zan taya
ki." Ta ce,"Na ko gode miki." Ta ce,"Na ga sako,
gaskiya amarya kayan sun yi yawa, har yanzu
kallon su na ke yi." A'a Wallahi bakomai. To na
gode. Allah ya saka da alkhairi." Ta amsa,"Amin,
sai kin sake ji na. A gaida mutan gidan." Za su ji,
na gode." Kowa ya kashe wayar. Take nan Zarah
ta tura mata lambar Naseer. Tayi shiru tana
mamakinsa, domin tuni ta gano manufar sa. Ta
numfasa ta ce,"Abinda yayana ke yi sam-sam ba
shi da amfani." Ta hade kaya cikin ledojin su ta
kwashe ta shige da su daki. Inna na ta barci, ta
aje gefe kafin ta tashi.
Riginginen da Naseer yayi bisa gadon dake dakin
barcin sa, babu abinda yake tunani, illa kalmar
da Zarah ta gaya masa. Ba karamin kona masa
rai tayi ba, haka kuma yake mata fassara kala-
kala. Ko shakka babu, abinda yake zato, ya
tabbata gaskiya. Zarah kallonsa kawai take yi.
Rashin sanin yadda zai yi, ya wanke kan sa shi
yasa shi cikin damuwa tare da k'ara tsanar auran
sa da Nusaiba. Wayarsa da ke ta faman ruri, bai
sami daga ta ba har ta katse, ta sake dauka.
Sannan ya ja dogon tsaki, yasa hannu ya lalubo
ta a aljihun gefen rigar sa. Kawai O.K ya dannan,
ya kanga wa kunnansa, "Hello! Ya fadi murya
dakushe. Ta ce, "Hello, Nusaiba ce." "Wuf ya
tashi zaune, shiru yayi, yana tambayar kan sa,
ina ta samo lambar sa? "Hello! Ya sake fadi ya ce.
"Hello, ya ki ke? Ta amsa, "Kalau. Kawai na kira
ne inji ya ku ka iso? Ya ce,"Lafiya, na gode." Koda
yake lambar ma sai da na roka. Ban cancanci
samun ta ba ko? Ya kara 6ata rai, kamar ya amsa
da eh. Abban sa kadai yake dubuwa,"Ya dan
lumshe ido, ya bud'e ya ce,"Ba haka bane,
amma ba za ki gane ba. So ki bar shi a mantuwa
kawai.". Ta ce,"Na yarda, ai kowa na mantuwa,
sai dai wani lkcn akwai rashin kulawa." Jin za ta
gano shi, yasa yayi mata dabara ya ce ,"Ke ma ai
ba ki ba ni ta ki ba, ba ki damu da in sami
lambar ba kenan? Tayi dan murmushi, ta nuna
masa ta fi shi, duk abinda yake tak'ama da shi."
Tsakanin na da kai wa ya kamata ya tambaya?
Tambayar ta, ta kure shi, kuma tuni hirar ta
ginshe shi, don haka ya gunutle ta da fadin "Na
ce mantawa na yi, ina ganin ya wuce, tunda kin
samu, wannan ce ta ki? Ta ce,"Kwarai, ya wuce,
in dai Antuna na nan ban da matsala. Lamaba ta
kenan. Sai na ji ka." "Shi kenan nan gode." Ya
kashe wayar yana dan tsaki." Washe gari tun safe
ya wuce Kano, don gudanar da wasan su da
(Kano Riders). Ko alama Naseer bai da kuzari,
domin tun ranar da Alh. Basheer yayi masa
albishir da auran Nusaiba, ya rasa duk wata
natsuwa ta sa. Gaba daya ya dora wa kansa
damuwa. Ya dawo tamakar maras lafiya.
Tambayoyin da Yakubu ya rinka yi masa kenan a
dakin (Hotel) din da aka sauke su, amma ya ce
babu komai, kawai jikin sa ne bai masa dadi.
Sannan yana jin kamar baya sha'awar yin wasan.
Yakubu yayi ta kwantar masa da hankali, yana
kara koda shi tare da nuna masa nan fa garin
bayinsu suka zo.
***hhh wai bayinku,hada rai,dan karamin
tsaki,,mttssswww.. Maji magani****
Ya zama dole ya zage damtse ya ba mara da
kunya, su nuna masu sun zo garin su, sun fi su
rawa.Ya ji ya amince da shawarwarin Yakubu,
amma ba su cire masa damuwar sa ba. Karfe 2
saura 'yan mintoci, gasa ta kankama. Naseer dai
ya hau doki ne. Alh. Basheer na ta yi masa
addu'ar samun Nasara. Yakubu ya bubbugi
kafadar sa ya ce,"Ja mu je, dan gidan Alhj, ba
wani bayan kai! Ya zaburi doki, ya fada sahu.
Duk dawakai sun jeru izini. Kawai suke jira su
tashi jimawa kadan aka ba su izinin tafiya. In ba
ka yi, ba ni wuri. Naseer fa ya cilla, sai dai tafe
yake yana tunanin zuci. Babu abinda ya fi masa
yawo a rai, sai zancan Zarah muryar ta yake ji
tana fad'in **"Ni kuwa yayana gani na ke duk
zance ka ke yi. A hankali za ka so ta!** Yana
tafe, yana girgiza kai da karfi, don bai son jin
muryar. Kamar ma karuwa ta rika yi. Shine akan
gaba,"Jama'a na ta hargowa, muryoyin su suka
yamute masa tare da ta Zarah. Kiris ya rage ya
iso karshe, bai san lkcn daya saki linzami ba, ya
kame kan sa, yana layi tare da kiran "Inna-
lillahi"Wa-Inna-ilahir-raji'un! Duk su Alhj suka
kame kaf, suna hangen sarautar Allah. Ko kafin
su gama mamakin meke shirin faruwa? Naseer
suka hango yana mulmulowa kasa. Alh. Basheer
ya keto fili a guje, dukkan yaran sa suka rufo
masa baya, yayin da tuni 'yan taimakon
gaggawa suka kai wa Naseer dauki. Ya ji ciwo
sosai, in ban da jini, babu abinda ke fita ta
hanci ta baki. Kowa ya rude musamman Alh.
Basheer da Yakubu. Nan take motar asibitin ta
dauke shi zuwa asibitin Murtala, inda ya sami
taimakon Likita. Bayan an gama bincikarsa babu
karaya, inda ya ji raunuka, an daure su da
magani, sai Alhj ya dauko shi zuwa gida. Ba su
tsaya Zariya ba, kai tsaye Kaduna ya wuce da
shi asibitin Likitansa, yasa aka ware masa daki
na musamman shi kadai. Daga bisani ne suka
sanarwa duk wad'anda suka dace su sani,
musamman su Abba. Kan ka ce kwa6o? Asibitin
ya cika da iyaye da masoyan Naseer, duk da
dare ya fara yi. Anan Zaran da Nusaiba suka
fara haduwa ko da ganin junan su, babu
gabatarwa, take nan suka shaida junan su.
Nusaiba ta rike hannunta, ta nuna ta ga su
Alhaji. Ta gaida su cikin ladabi da girmamawa,
su ma suka amsa cikin fara'a, tare da nuna
kauna gare ta. Shi kuwa Naseer barci kawai yake
yu, bai ma san wad'anda suka zo ba. A daran
nan suka sake biyo hanya, suka dawo Zariya,
aka bar Abba tare da shi. Zarah da Nusaiba kan
ba su runtsa ba, saboda tunanin yanayin da
suka baro Naseer. Duk da cewa Likita ya ce da
saukin jikin amma abin akwai tausayi. Abu
kamar hadarin mota, ko ina ciwo. Haka hankalin
Alh.Basheer ke tashe, domin bai bar asibitin ba,
sai 12 dare, suna tare da Malam Balarabe. A
lokacin ne suke shawarar dole a rink'a yiwa
Naseer addu'a, saboda yanayin bakin mutane.
Don Yakubu ya gaya wa Alhjn labarin da Naseer
din yake fadi, kafina fara wasar. Washegari haka
su Umma suka dawo mota guda (Bus). Naseer
na kwance baya ko iya tashi, saboda tsamin jiki.
Komai da ake bukata, sun iske direba ya kawo
daga gidan Alhj. Bayan kamar awa daya, motar
ta juya da su Inna. Aka bar Umma da Zarah
tare da Sageer. Su Biyun ma kadai ke tare da
shi lkcn da Direba ya sake dawowa da Nusaiba
da Umminta. Ummi na gama gaishe shi, suka
sake fita tare suka bar Nusaiba tare da su.
Kowacce na zaune, sun tasa shi gaba. Sageer ya
dube su, yayi dan murmushi ya kada kai.
Naseer ya dago ido, ya ce,"Lafiya? Ya ce,"Lau.
Me aka yi? Ya amsa,"Gatan yayi maka yawa.
Kamata yayi ka mike kawai, ka ce ka warke. Ko
me ku ka ce tagwayen Jah-Jah? Lumshe ido
yayi, ya kauda kai, yayin da Zarah ke
fadin,"Gaskiya ne, amma don ragwanci ko motsi
bai iya yi." Nusaiba ta ce,"Ina fatan ma dai ya ci
abinci? Don na lura, baya son cin abinci." Ya
bude ido, ya kwada mata harara, in ban da
salo, yaushe ta san ban son cin abinci? Ya maida
idon ya runtse, yana wani gajeran tsaki. Zarah
ta cafe,"Babu 'yar tsaki anan yayana, ina jin
Abba na gaya wa Umma ko dan Tea kadan ka
sha. Ba tare daya bude idanuwan sa ba, yake
fadin,"Ai sai ku yi min dure."Ta ce,"Yanzu kuwa,
amarya hado min Tin ya gani, idan gatse yake
yi." Ta kuwa mike ta hado shi. Yana kallon su.
Sageer na ta dariya. Sageer dago mana shi." Inji
Zarah. Ya dubi Sageer din, ya kara daure
fuska,"Ta6a ni, ka ga yadda zan fasa ma baki."
Ya ce,"A hakan? A hakan kuwa." Nusaiba ta
ce,"A janye 'yar wasa, yakamata ka sha Tin nan.
Daurewa za ka yu." Ya rufe ido,"Na koshi." Da
anyi magana kuwa, sai ka rufe ido, zama da
yunwa ai wani ciwon zai sa maka." In ji Zarah.
Wani irin kallo yai mata, bai ce komai ba, ya
maida idon ya sake rufe shi. Shiru bai kara
tankawa kowa ba, har suka gaji da rarrashin sa
ya sha Tea. Alhaji na shigowa Nusaiba ta labarta
masa. Bakin gadon ya zauna ya ce Sageer ya
kama shi ya tashi zaune. Da kyar ya iya zama,
saboda ciwo ga takaici. Alh. Basheer yasa aka
miko masa kofin Tin. Ya debo a cokali ya
ce,"Ungo ka sha Naseer ciwo da yunwa
mazaunin su daya, gaba daya suke mukurkushe
mu2m." Malam Balarabe da Umma suna ta
murmushi. 'Yar kunya ta kama shi, ya sunkuyar
da kai." Kar6i mana, menene abin kunya, ni ba
Abbanka bane? Ya miko hannu ya kar6i kofin."
Zan sha Alhaji, kawo." Ya mika masa yana 'yar
dariya. Kur6a yake a hankali. Alhj na rarrashin
sa har ya shanye, a je kofin.
~~~~~~~~~~~~~~~
Sati 2 yayi a asibitin, shi kan sa idan zai fadi
tsakani da Allah, ya san shi dan gata ne, kuma
Alh.Basheer ba karamin so yake masa ba.Hatta
Hajiyar su Yakubu, miyar kajin turawa tayo masa
dakwale cikin kwano, ta kawo masa. A 'yan
tsakanin nan shakuwa tsakanin Zarah da Nusiba
tayi karfi sosai, sun fahimci juna kwarai da
gaske. Kausar kanta, ta yaba da Zarah kuma
tana mata kallon wacce za'a zauna lafiya da ita.
Shi kuwa uban gayyar tamkar ya dauke kan sa
ya maida gida yake ji, saboda ginsa da yayi da
zaman Kaduna. Abu mafi ban haushi a gun sa,
wanda yake k'ara sanya shi damuwa, shine
gaba daya aka hade masa kai. A ganinsa kenan
babu wanda zai kai wa kukansa, illah mutum
daya, watau Naseer B. Shi yasa daya zo asibitin,
ba shi da abokin hira, sai shi. Yayi ta yi ma sa
famfo, yana k'ara cusa masa kiyayyar Nusaiba a
rai. Koda aka sallame shi, haka a kodayaushe
Alhj ke tafe masa da abubuwan alkhairi., sai da
ya tabbatar da Naseer ga gyagije sosai.
~~~~~~~~~~~~~~~~~~ Watannin 4 suka shude a
cikin wannan hali, babu abinda ya sauya a
zuciyar Naseer a game da auran Nusaiba. Yana
zuwa wajen ta, don bin umurin kawai, haka ya
kan kira waya, ya ce mata ya take? Sai dai idan
ta turo masa (Text) da ingatattun kalamai, shi
sai ya tura na shi babu komai ciki (Blank) Ga
musun tsiya, idan za ta shekara gardama, ba zai
ta6a sakar mata, dole ne ta yarda, ya turo sako,
wayar ta ce mai matsala. Saboda haka ne ta
daina ba ma kanta wahalar aika sako. Sai dai
abin yana bata mamaki yana kuma sanya ta a
tunani. Me yasa sauran sakwannin ke shigowa
dai-dai, amma ban da na shi?Musamman
sakwanin gaisuwar Ibrahim da take yawan
samu. Kodayaushe baya gajiya wajen aiko mata
da (Text) din gaisuwa da addu'o'i, wani lokacin
har da kalaman so da kauna masu neman
dagula lissafin ta. Haka nan take dauke kai, ta
fuskanci zabin Abban ta, koda sau daya, za ta
ga murmushi sa a sati. Wannan ta aje shi a kila
haka halittar sa take, miskilanci. Kuma haka
kawai, ta ji miskilancin yayi mata dai-dai, domin
ita kanta bata cika son namiji mai yawan dariyar
tsiya ba.
Karshen watan nan su Zarah suka kammala
jarrabawrsu ta karshe. Ko dama ita kadai ake
jira. Nan da nan shirye-shiryen biki ya kankama
musamman a Kaduna gidan Alh. Basheer. Ba
k'aramin gagarumin biki aka shirya ba. Gidan
daya ba su, tuni aka gama gyare-gyaran cikinsa,
aka fent shi ciki da waje. Sannan yasa aka zuba
tsaddadun abubuwan bukata na gani na fada
har sashin Zarah. Duk da haka Naseer ya kashe
wa Zarah makudan kudade wajen siya mata
kayan daki, musamman kayan kicin, kuma
kullum gaya mata yake yi ta rage shishshigewa
Nusaiba, don kar ta raina mata ajinta. Ko alama
Zarah bata son irun wadannan kalamai na sa, a
kodayaushe, tana nuna masa ita da zuciya daya
take kaunar Nusaiba.
Biki saura kwana 7, Alh. Basheer ya kira Naseer,
abinda ya gani ya daure masa kai, wasu kaya
setin akwatuna ne guda 2, gaba daya shakare
da kaya. Ummi ta bubbude masa daya bayan
daya,kafin Alhj ya ce. Wad'annan akwatuna seti
daya Zarah ne, daya kuma na Nusaiba ne.
Kamar yadda yake a al'ada, kowace amarya ana
kai mata. Wannan tsakani na da kai ne ko
Umminku na gargade ta, ban ce ta gaya wa
kowa ni ne na yi su ba, kai ne ka kawo wa
Nusaiba. Wancan setin kuma ka kai wa Zarah.
Shiru Naseer yayi, ya rasa ta cewa, domin
zuciyarsa cunkushe take fa mmkn Alhj. Watau
ya dai dage sai ya siye shi da karfin Naira. Kudi
shegu ne. Ya karkada kai,"To ni me zance
yanzu? Idanuwansa suka cika fal da hawaye. Irin
wannan hidima ko kallon banza na yi wa
Nusaiba, idan Abba ya sani, ai na kade, sai
ganye na." Bai san kwalla ya zubo masa ba, sai
da ya ji Alhaji ya dafa shi, yana fadin. "Haba
Naseer, menene haka? Kai ba Da na bane?
Kullum ina gaya maka hakan, amma kamar har
yanzu ba ka yarda da ni ba. Look! Ka na ji na?
Nusaiba kawai gare ni, sai Allah ya k'ara min da
kai, na kuma gode masa. To kai ma ka gode
masa domin kyautar daga gare shi take. Share
hawayen nan don Allah."Ya kai hannu ya goge
kuncin sa, yayin da Ummi ke fadin,"Namiji ai
jarumi aka san shi, kar ka ba matan ka kunya
mana." Ya kara sunkuyar da kai Alhj na dariya.,
Mai-gadi ya loda masa akwatunan a bout, shi
kuwa yana zaune, yana zuba godiyar karfin hal.
Nusaiba bata nan? Sun shiga gari da Kausar
shirye-shiryen biki." Saboda haka ba 6ata lokaci,
ya damko hanya, ya dawo cike da aljabi tare da
wasi-wasi wai kauna ce ta sa Alhj ke masa
hidima? Shi kam bai yarda ba, saboda 'yar sa
da yake son lik'a masa ne kawai.
****Kai jama'a nifa Naseer dinnan yafara bani
haushi****
Ga Abba tare da Umma, sun baje akwatuna ba
sa aikin komai, face sa albarka. Umma har
kwallanta sharaf-sharaf. Bayan sun natsa.
Naseer ya ce dole a kaiwa Zarah gaba daya
kayan, watau da nasa setin akwatunan da yai
ma ta., Abba ya ce hakan bai zama adalci ba,
zai fi kyau ya aje su, bayan sun tare gidansa, ya
raba masu kowacce ta kwashe kason ta. Umma
ma ta goya wa Abba baya. Akan dole Naseer ya
karbi wannan shawarar. A yammacin ranar.
"Yan-uwa da abokan arziki suka kai kaya gidan
su Zarah. Hakika iyaye da 'yan uwan Zarah sun
ga abin mamaki, domin sun ga kaya iya ganin
su. Su kuwa Abba da Umma a kodayaushe a
cikin dogiya da shi wa Alh. Basheer albarka suke
har zuwa ranar daurin aure, yayin da hidimomi
da dama na shagalin biki akai tayi a Kaduna da
Zariya. Nusaiba tana zuwa na Zarah. Ita ma
Zarar ta halarci walima da (Mother's day) a
Kaduna. ~~~~~~~~~~~~~~~~~~~~~~ Ranar asabar
da safe karfe 11, aka daura auran Naseer da
Zarah. Karfe 2 dai-dai ita ma Nusaiba ta
tabbata mata Naseer, tun daga lokacin duk wani
farin ciki da ke zuciyar ango ya rufe kofar sa.
Wani irin yanayi daya rinka yi a wajen, shi ya
tabbatar wa Sageer lallai abokin sa na cikin wani
yanayi na daban, don haka ya ja shi gefe, ya
kare masa kallo, gaba daya idanuwansa jajur!
Suke. Ya sanyaya murya ya ce,"Ka ga yadda ka
dawo kuwa Naseer? Bai kamata ka rikide haka
ba a wajen nan, don ba haka aka san ango ba."
Ya sauke numfashi, a yamute ya ce,"Ban son
yarinyar nan Sageer, ka na zaton wasa na ke yi?
Mts! Yayi dan gajeran tsaki, ya kauda kai,
"Rayuwa ta vata damu kowa ba, sai shahalinku
ku ke yi, ni kadai na san abinda ke damu na. Ka
je ku ci gaba da hidimomin ku. Ka kyale ni
kawai." Jikin Sageer yayi sanyi, tausayi ya kama
shi, ya kamo hannu Naseer ya ce, "A hankali za
ka so ta mutumi na. Please ka jure, ka zama
namiji, kar ka mance kuma har da Zarah yau ta
ka ce, halas-malak. Yakamata ka gode Allah,
domin yayi maka kyautar da ba kowa ke samu
ba. Mata 2 a lokaci guda ko a zamanin da, sai
dan gata. Illar kawai da ba ka son Nusaiba.
Amma ina gaya ma za ka so ta, saboda yarinyar
bata da wata mishkila." Ya dauke numfashi."
Sageer ba zai gane ba, menene amfanin
maimaita magana 1? Ya fada a ran sa. Ya daga
ido zai ce wani abu. Kausar ya hango tana
dube-dube, da gani, su take nema, don haka ya
ce,"Ha sarkin kaudin can zuwa, da alama mu
take nema." Sageer ya juya, ko kafin su fito fili
ma, ta hango su. Wajen ta nufo,"Haba ango
kuma sai ka 6oye, ina ta billayin nema? Ya
ce,"Magana muke." Ta ce,"Ummi ce ta ce in
tambayi motoci nawa ku ka zo da su? Sageer ya
bata amsa." Akwai kanana 10, ga kuma wata
Bus can, sun isa ko a karo? Ta ce,"Bari na
tambayo. Ta sake duban Naseer." Ango! Ango!!
Ya dan murmusa, ya kauda kai, ta ce, "Har yau
din ma murmushi kawai zan samu? Bakin ango
ai baya rufuwa, balle kai mai Double. Zan so in
ga Competition din. Ni zan ba ka abinci a baki,
ni zan kai ka ka sha madara! Dole ta sanya shi
dariya. Sageer kam har da kyalkyawa. Ta wuce
da sauri, tana fadin " Ku jira ni, na tambayo,
Naseer ya gintse dariyar, ya ce,"Wannan 'ya da
tsanannan surutu take." Ya ce,"Ba ga shi ta sa
ka dariya ba? Mts! Ni yanzu ma zan sa6e." Ka je
ina? Ya ce, "Zariya zan koma." Wajen Zarah ko?
Me za ta yi min? Ban da ta k'ara 6ata min rai?
Ai duk bakin ku daya. Makullin Naseer B zan
kar6a, in je dakin sa, in huta awa 2, kafin ku
iso."Sageer yayi dariya, ya ce,"ANGO kenan, kai
wane hutu ka ke nema a wannan yamutsin? To
Allah ya kiyaye hanya, amma ka san duk taron
nan, saboda kai aka yi shi ko? Hakkin ka ne ka
ba kowa kulawar da ta dace." Ya ce,"Menene
amfanin ka? "Ba wasa na ke yi ba, tafiya zan yi
idan na ci gaba da zama wajen nan, jini na zai
hau. In wannan kwakwazon ta dawo, ka san
yadda za ka yi da ita. Sai kun taho. Kamar
wasa, haka Sageer ya saki baki yana kallon
Naseer ya amshi makullan Naseer B, ya wuce ya
fada mota. Jama'a da maroka na bin sa, yana
fadin yanzu zan dawo. Yana nan tsaye. Mamaki
ya kusan kashe shi. Kausar ta dawo ta shaida
masa moticin sun isa, idan ma da k'ari. Ummi
ta ce ba matsala. Abba ya ware wasu
masamman, don dibar jama'a. Naseer bai san
lokacin da barcin takaici ya sa ce shi ba, bisa
katifar Naseer B. Can a mafarki yake jin wayarsa
na bugawa. Ya bude ido da kyau, duk jikin sa
yayi tubus! Saboda tsabar gajiya, da gaske
wayar ta sa ce ke bugawa. Ya lalubo ta, ya duba
Sageer ne akan layi. Cikin muryar barci ya
ce,"Ya aka yi? Ya ce,"Me kuwa aka yi? Dan rainin
wayau. To mun iso muna fly-over yanzu. Idan
ka ga dama, mu hadu a can ,"Yanzu da gaske
kun dauko yarinyan nan." Haushi ya kama
Sageer, ya rasa me zai ce? Sai yayi tsaki ya
kashe wayar sa, ya ci gaba da tuki. Naseer ya
dubi agogo karfe shida da kusan kwata. Ya mike
da kyar, yayi mika, kansa kawai ya ji ya dauki
ciwo, ba kadan ba. A haka ya fito ya kulle dakin
ya shiga mota, ya nufi (Hanwa Low-cost). A
hanya ya kira wayar Umma, ya shaida mata
bakin sun iso. Nan da nan aka shirya kayayyakin
abinci kala-kala. Bus guda tare da 'yan tar6ar
baki suka tafi. Naseer na isowa. Jeep din Antin
Jordan na fakin. Ta fito da yaranta, wajen ta ya
nufa, ya dan rankwafa, yana mata sannu da
zuwa. Bakinta har kunne, ta bubuga kafadar sa.
"Angon Nusaiba. Angon Zarah. Ina ka shige, na
yi neman duniya, ban gan ka ba? Ya shafi k'eya,
ya ce,"Kira na aka yi nan Zariya, dole na dawo."
Anti ta ce,"Haka wannan abokin na ka ya ce,
"Dama an daura aure, ban ga ango ba, ko sau
daya, shi yasa na tambaya. To Allah yasa
albarka." Ya ce, "Amin." Ta wuce ciki, shi kuwa
ya wuce wajen su Sageer. Yana wa Allah godiya
da karyar sa ta zo dai-dai da wacce Sageer yayi.
Karfe 9 saura kwata aka kawo Zarah, a lokacin
bakin Kaduna duk sun juya, wadanda suka rage,
ba su fi mu2m 10 ba. Antin Jordan da kan ta, ta
jagorance su zuwa sashin Zarah. Bayan yan
kawo amarya sun gama ba ido su abinci, motoci
suka koma da su gida. Aka bar mu2m 3, suka
taya ta kwana. Haka ma Zarah ba karamin
mamaki ta sha ba da ganin dakin auranta. Ko a
mafarki bata ta6a tunanin irn sa ba, saboda
haka ta kwana yi wa Allah godiya tare da rokon
sa zaman lafiya dauwamanme. Washegari
safiyar lahadi, karfe 9 za'a gudanar da hawan
Yakubu. Sukuwa ta musamman wacce Yakubu
ya shirya. Filin sukuwa ya ci ka fal da Zaratan
'yan wasan tseren Polo daga ko'ina 'yan kallo
kuwa babu masaka tsinke maza da mata.
Alh.Basheer da tawagar sa ma suna wajen.
Tsofaffin 'yan wasa irin su Yakubu da shi kan sa
Yakibu su suka fara sharar fage, inda dokin
Yakubu yayi wa saura fintinkau. Daga nan
sukuwa ta ci gaba. Kowa na nuna bajintr sa,
abin gwanin sha'awa, sai wanda ya gani. Karfe
11 dai-dai, rana ta soma zafi, wasa ya zo
karshe, kamar yadda Yakubun ya shirya. Ango
shine zai rufe fili, don nuna farin cikin sa ga
dimbin masoyan sa da suka taru. Saboda haka
Yakubu ya mike ya dau lasifika yayi wa ango
kirari, ya kwarzanta shi, sannan yayi kiran sa,
"NASEER, ta so ka ja mu je! Yana mike wa, duk
wuri ya yamutse da hargowa da tafi, shi kuwa
kansa ne ya ji yana sara ma sa. Domin duk
lokacin da aka kira shi angon Nusaiba, ya kan ji
jinin sa ya k'ara hauhawa. Ya tsaya gaban dokin
da ya saba hawa, ya cire kuben da ke kan sa.
Yakubu ya dora masa ta kwano. Ya taka ya haye
doki. Ji ka ke tafi, ta ko'ina. Yayi karfin hali, ya
daga hannayen sa sama, yayi gaisuwa ga kowa,
sannan ya tsala wa doki bulala, yayi haniniya ya
zura a guje. Naseer fa bai san abinda yake yi
ba, gudun kawai yake yi kura na tashi., Rayuwar
sa gaba daya cikin kunci take har ya kan kai ga
lokuta da dama yana mancewa da tunaninsa.
Abinda ya faru da shi kenan a halin yanzun. Ya
sakarwa dokin sa linzami, ba san irin gudun da
yaje yi ba. Ai kuwa ba a jima ba, kafafuwan
dokin suka sarke, yayi haniniya, yayi sama, me
jama'a za su gani? Ango ya watso k'asa
warwars! Wuri yayi tsit!Na 'Yan dakikai, sannan
gaba daya jama'a suka dauki salati, yayin da
tuni jama'a da ke kusa da wajen, suka yanyame
shi. A sume suka wace da shi asibiti. Ba 6ata
lokaci aka kai shi (Emengency). Kowa ka duba,
hankalinsa tashe yake, musamman da Likita ya
ce yana da karaya 2, a hannun sa na dama.
Alh.Basheer zufa kawai ke keto masa, fadi ya
ce, "Inna-lillahi"Wa-Inna-ilaihir-raji'un! Ana cikin
halin haka, su Malam Balarabe suka iso, ba'a
jima ba Jeep din Antin Jordan ta aje su tare da
amare. Kowacce ido warwaje, ta sha kuka. Ba su
ma yi kuka ba, sai da suka ga angon su
magashiyyan a kwance, bai san halin da yake
ciki ba. Antin Jordan kuwa tunda ta iso ta tsinke
da fada, kamar ta ari baki, wai me yasa za'a
bar ango yayi sukuwa? Duk laifin na su Alhaji
ne, haka take ta fad'a. Sam ta mance haka
Allah ya kaddaro. Bai farfado ba, sai la'asar, ya
sha mamakin ganin sa a gadon asibitin. Wani
sabon bakin ciki ya sake turnike shi. Wannan
wace irin masifa ce?




Zaharaddeen Shomar


Whatsapp  08168575100






Ajininsa yake 2-02
Posted by ANaM Dorayi on 11:41 PM, 11-Nov-15
Under: Ajininsa yake
_______ NA ZULAIHAT SANI KAGARA_______
.
.Gaba daya an gur6ata masa rayuwarsa? Take
nan ya kara tsanar Nusaiba, ba wai a zuci ba ya
kadai ba, har cikin jinin jikinsa yake jin bai
sha'awar zama tare da ita...Lallai iska na wahalar
da mai kayan kara, domin Alhj ba karamin
hidima ya sha ba a asibitin nan da kudin mai
dorin gargajiya. Angwanci dai ya dawo asibiti.
Anan abokansa da suka zo daga nesa suka yi
bankwana, suka koma zukatan su cike da
tausayin Naseer. Baya magana da kowa, illah
iyaka eh, ko a'a, ko kuma ayi masa sannu ya
amsa. Hatta ita kan ta Zarah kallon ta kawai yake
da ido, domin haka ya fiye masa kwanciyar
hankali, kar a gane da ita kadai yake magana.
Kwanansa 3 a Shika. Likita ya gama tabbatar wa
Alh.Basheer babu wani rauni a jikin sa, sannan
aka sallame shi. Aka dawo da shi gida. Haka suka
wuni kar6ar baki, a cikin su harda su Lubabatu,
Hauwa'u da Maryam, watau mutanen Zarah na
makaranta. A daren wannan rana Zarah ta feso
wanka, ta sa wani dan karamin dinkin atamfa riga
da siket, ta fito ta leka sashin Nusaiba, ita ma
wankan ta shiga, saboda haka ta wuce sashin
Naseer. Bisa kafet ta same shi zaune, ya jingina
da bango, idanuwansa rufe suke, sallamar da ta
yi. Shi yasa ya bude idon, yana kallon ta har ta
zo kusa da shi, ta zauna. "Yayana tashi ka yi? Ya
ce,"Na gaji da kwanciya, jiki na duk yayi tsami."Ta
dan dube shi, ta ce,"Sannu yanzu me za ka ci? Ya
dan kada kai,"Ban jin yunwa." Suka yi dan shiru
'yan dakikai, ta dago ido ta dube shi. Ita shi ma
yake kallo, don haka tayi dan murmushi, ta sauke
na ta idon. Hannun sa ta ji ya riko na ta, jikin ta
yai sanyi, ta kasa motsi." "Zarah!" Ya kira ta a
wata siga mai taushi. Kunya kawai ta ji ya lullube
ta, ta kasa duban sa. Ya kara kwantar da muryar
ya ce,"Ki dube ni, na ce, ni ba angon ki bane? Ko
don kin ganni a karye? Hannun ta daya, ta dan
kare baki, tana murmushi. Ya kara runtse
yatsunta ya ce,"Kin ga irin ta, ba don kun jawo
min ba, ai da tuni na kauda wannan kunyar." Ya
kara bata kunya, kamar ta tsere. Ya jawo ta, ta
matso shi sosai, ya rungumo kafadarta ya ce,
"Zarah kullm ina yiwa Allah godiya daya ba ni ke,
saboda ke kadai na ke so a rayuwata. Sai dai
yanayin da na ke ciki, ya zame min wani jarabci,
wanda na ke ganin sai kin taya ni addu'a. Allah
ya kawo min iyakar sa. Allah yana gani, kuma ya
ga abinda ke zuciya ta, tamkar kan k'aya na ke
cikin gidan nan. Saboda haka na ke neman hadin
kan ki, ki taimaka min kullum ki kasance tare da
ni, domin ke kadai ke yaye min bakin cikin da ke
rai na."Ta sauke numfashi, cike da tausayi, ta
dan dube shi ta ce,"Kullum ina tare da kai
yayana, na sha gaya maka, ka daina damuwa. Ka
kuma daina daukan wannan aure a wani matsayi
na daban, face hadin Allah. Ba ka san abinda
Ubangiji ya 6oye a cikin sa ba. Ba wai ba na
kishin ka ba ne, ko alama ba haka bane. Ban ki
in kasance ni da kai a gidanka ba, amma na yi
imani da cewa, duk wanda zai yi jayayya da
shinrin Ubangiji. Tabbas yana tare da wahala, ga
kuma tarin zunubi. Domin daga nan ne mutum
yake fadawa muguwar hanya, saboda bakin kishi.
Na san ka na so na yayana, amma ka sa ni.
Nusaiba ma amanar ka ce." Shi fa ba ya ma ko
son ya ji an ambaci wannan sunan, sai ya ji
kamar ya kurma ihu. Yayi ta maza saboda Zarah
da ke kusa da shi. Ha6arta ya dago ta dube shi,
yayi murmushi sosai, ya ce,"Na ji maganar ki,
kuma zan yi iya kokari na. Abinda ba na so kawai
a rink'a saurin kama ni da laifi.." Ta ce,"Kamar
yaya? Ya kada kai, ya ce,"Wannan sirri na ne, ba
zan fada ba, na samu ana kallo na, kunya ta sa a
daina. Kinga na yi wa kai na." Ta sa hannu ta
dan buge hannun sa da ke ha6ar ta, ta kauda
fuska, tana 'yar dariya. Shi ma dariyar yake yi, ya
sake juyo fuskar ta, ya jingina gashin sa jikin na
ta, ya ce,"Kin min alkawari kullum ki na tare da
ni, me yasa za ki kauda min fuska? Ta kwantar
da ido k'asa, bata tanka ba." Kin sa tayi 'yan
sumbatar kuncinta,"Da ke na ke magana." Ta
ce,"Bari in kira amarya mu shirya yadda za mu
rink'a girki." Ta yunk'ura za ta mik'e, ba tare da
ta ji ta bakin sa ba. Hannun ta gam!Ya rike shi.
Ta juyo dauke da murmushi ta ce, "Don Allaj bari
in kira ta." Ya lumshe ido, yana girgiza kai,"Ban
ce ba." Ta dade tana kokarin kwacewa, amma ta
kasa. Motsin bude kofa suka ji. Tare da sallama,
ta dage da karfi ta fizge hannun a lokaci guda,
shi ma ya sake ta yayin da Nusaiba ta kawo kai.
"Bata fahimci komai ba, domin Zarah a tsaye
take. Shi kuwa dan gogan tuni ya dauke kai cike
da haushin Nusaiba, ta katse masa hanzari." Ke
za ni kira amarya, na lek'o dazu ki na wanka."
"Ta ce,"Ni ma na shiga, ina ta sallama, na ji
shiru. Ya jikin na sa? Na gan shi a k'asa ne." Duk
suka zauna suka sanya shi tsakiya. Zarah na
fadin,"Ni ma na shigo, na gan shi zaune ana. Wai
ya gaji da kwanciya." Ai da gajiya, kwanciyar."
Koma yau da bango ya jingina, ya rufe ido. Ta
ce,"Sannu." Da kai ya amsa. Ta mike ta dauko
filo, ta tsugunna gabansa,"Dan daga in sa maka
filo, zai fi maka dadi." Yayi shiru kamar ba i ji
ba.Yayin da Nusaiba ke fadin,"Shi ke nan gara da
ka sa baki. Da su Antina za'ayi min wayau." Ya
kalle ta a dage ya ce,"Kyale ta kawai, tashi ki tafi
abin ki." Ta kuwa mike za ta wuce, Zarah ta
rikota,"Wai sai ki tafin kuwa? Ta ce,"Me zan jira
Antina? Ai na yi ma ku hira, yakamata in je in
barci." Karfe 9?" "Eh mana. A kwanta da wuri, a
tashi da wuri." Fuska yamute ya ce,"Don Allah ki
kyale ta, ta wuce mutun na jin barci a hana shi?
Tana can tana kallon Naseer, ya 6ata rai ba sauki,
Nusaiba ta zame hannunta,"Allah ya ba mu
alkhairi. Yayanmu Allah ya karo sauki." Amin." Ya
fada a fizge. Ita kuwa Zarah ta kasa ma motsi
tayi. Tana kallo Nusaiba ta bar dakin. Dariya ya
kamayi, ganin yadda Zarah tayi sukuiti duk jikinta
ya mace." Ta nuna shi da yatsa ta ce,"Ka daina
sa mana baki idan muna magana." Fuskar ta
kunshe da shagwa6a. Dariya ya ci gaba da yi
mata. Suka ci gaba da hira. Karfe 11 da kyar ya
bar ta ta koma dakin ta, ta yo shirin barci ta
kulle dakinta, ta dawo wajen sa.
~~~~~~~~~~~~~~~~~~~ Bayan kwana 2. Nusaiba
ta kar6i girki, a ranar kuwa gidan cike yake da
baki da 'yan dubiya har da iyayen su. Tare suka
hada suka yi girke-girken abincin su kuma tare
suka ji ta kula da bakin su.Kamar yadda suka
saba gwanin sha'awa. Zarah ta gaji tu6us! Don
haka tana yin ishha'i, tayi wanka ba ta jira komai
ba, ta bi lafiyar shimfidadden gadon ta, babu
6ata lokaci, barci ya sace ta. Nusaiba kuwa bayan
ta gama shirin ta, sashin Zarah ta soma zuwa,
kofar falon na garkame. Ta tsaya kame da
ha6a,"Ba dai hat Antina tayi barci ba? Lallai
Antina." Ta jinjina kai ta wuce wajen Mai-gidan.
Yana kwance, gaba daya dakin yayi masa
bakikirin. Babu abinda yake tunani illah Zarah,
abinda ke 6ata masa rai kuwa, yai ba ita zai gani
a dakin sa ba. Ko sallamar ta bai iya amsawa ba.
Ta zauna gefen gadon, tana fadin,"Ka san wani
abu? Wai Antina har tayi barci." Ya baki taso ta
ba? Ta kulle kofar falon ma Ya ce,"Yayi mata dai-
dai. Daga nan bai sake cewa komai ba, nan ya
bar ta zaune, a zaton ta ma barci ne ya sace shi.
Yana jin ta, ta rufe shi, sannan ya kwanta, sai da
tayi barci, ya jawo filon sa, yasa kasa ya dawo
nan ya kwanta. Karfe 2 dare, ta farka, don yin
sallar dare. Can ta hango shi bisa kafet Mamaki
ya kamata. Ta sakko ta tsaya kan sa tana kallo.
Kamar ta tashe shi, wata zuciya ta ce ma ta kila
ya fi son kwanciyar kasa ne. Don haka ta wuce
bayi, ta kama ruwa, ta yi alwala ta fito. Motsin ta
ya farkar da shi barci, amma san bai bari ta gane
ba. Ta daura zani, ta dora hijabi ta haye sallaya
ta fara sallah. Shi kan sa ta burge shi, da zai fadi
gaskiya. Ta jima bisa sallaya tana addu."a kafin
ta mike, ta nufo gunsa ta tsugunna. Yadda ya
kwanta a yaye babu lullubi, sai ta ga kamar sanyi
yake ji, don haka ta mika hannu ta janyo bargo
ta sake lullube shi. Ta koma gado tayi kwanciyar
ta. Naseer yayi shiru ya rasa me yake sakawa a
zuciyar sa. Har asuba bai koma barci ba, haka
kuma bai daina sake-saken iska ba cikin ransa
ba. ~~~~~~~~~~~~~~~~~~
Tsawon wata 1, Naseer yana samun kulawa wajen
amaransa da wacce yake so da wacce bai damu
da kulawar ta ba. A son ra'ayin sa ko sannu baya
buk'ata daga gare ta, shi yasa kullum yake jin sa
kamar bisa k'aya cikin gidan nan. Kuma bai san
dalilin da yasa kodayaushe k'ara tsanar Nusaiba
yake yi ba, duk da bajintar da suke nuna masa
ita da iyayen ta. Wani lokaci har tsoron zuciyar sa
yake ji, ta yadda ko alama ta k'i amsar Nusaiba.
Hannun sa yayi sauki sosai, domin har ya kan fita
ya je wajen iyayen sa, ya gaishe su. Bai ta6a
shiga sabuwar kerarriyar Jeep din sa ba, wace
Alhj ya sake masa, sai da Zarah ta goranta masa.
Shagon dinkin Sageer ya iso yayi fakin ya fito duk
jama'ar wajen idanuwan su akn sa. Idan ka dube
shi sai ka rantse da Allah wani hanshakain dan
kasuwa ne. Gaisuwa jama'ar wurin ya rinka
amsawa, sannan yayi sallama shagon. "Allah ya
kiyaye min na Zarah, angon Nusaiba." Ya wuce
shi ya zauna a kujera. Sauran yaran shagon suka
gaishe shi da jiki, ya amsa. Sageer ya biyo shi,
shi ma ya zauna kujerar gefen sa ya ce,"Duk na
zura ido in ga wa zai fito daga wannan
shimfidediyar mota, ashe Alhaji na ne, ka gan ka
kuwa?Ai za'a ce ka ba wata biliyan dari baya
mutumina." Ya ce,"Ka bari kawai, ni kai na tsoron
gidan nan na ke yi da motar nan. Zarah ce ta
matsa min na kinkimota." Yayi dan murmushi ya
ce,"Arziki. Kashi Naseer, ka riga ka tako kuma
kowa yana da hanyar da Allah ya shiryo masa
inda zai sami abincinsa. Allah ya kara hada mu
da masoyan mu." Ya dan nisa kafin ya ce,"Yanzu
tsakanin ka da Allah ba ka min kallon auran jari
na yi? Kyar Sageer ke kallon sa,"Me yasa kai ka
cika tsarguwa ne? To idan ma auran jarin ka yi,
ina ruwan mutum? Ina cewa shi ma mu2m ya
sami damar yin hakan, sannan zai yi? Naseer, ba
auran jariba, ko auran damfara ka yi, babu
ruwan ka da mutane kowa ta shi ta fishshe shi.
Abinda Allah ke duba ita ce zuciya, shi yasa ake
so a kodayuashe ta kasance tsarkakkiya." Ya dan
yi hucin zafi ya ce,"Na fahimce ka, amma kar ka
manta ba kowa ke da irin tunanin ka ba. Ni kuma
na tsani zargi, ina fitowa motar nan kowa sai
kallo na yake yi, har da gaisuwar gulma, dole in
na shiga wannan, ayi magana ta. Ka san ban da
hakuru, idan na ji ba za'a kwashe ta dadi ba,
komai gemun mu2m." Ya dan bubbuga kafadar
sa, yana dan murmushi,"Allah ya ki yaye min
angon amare, hakan ma ba za ta kasance ba.
Insha-Allahu. Ai yanzu ka wuce da ajin fada, sai
dai ka yi rabon na 'ya'ya a cikin gida ko ba haka
ba? Wani dan bazawarin murmushi yayi ya
ce,"Aje wannan maganar, ka san ina son yara,
kar ka tada min kwadayin su." Ko?" Sageer ya
tambaya, ido waje. Ya ce, "Ah? To mece ce ribar
auran?, Ita Zarah ma ta ki fara laulayi, sai ja min
rai take yi." Sageer ya fashe da dariya suka tafa.
Sannan ya nuna shi,"Zarah kadai? Har da
amarya, lokaci guda za su zazzage ma tagwaye."
Take nan ya sauya wani shafin." Ka san wani
abu? Na kusan fara zuwa koyon dinki, jira na ke
hannu na ya gama warkewa." Baki sake yake
kallon sa."Ina son ka ranar yanko zance, babu
seti. Mutumin da hidiman karatu ke gaban sa, ga
fita wasanni, yaushe za ka sami lokacin zama
nan? Lallai za ka sha mamaki, kai ba ka na
karatun ba, ka rinka koyon dinkin? Ya ce,"Ai na
ma riga na sha mamakin. To wai me yasa ka ke
son koyon dinkin yanzu?" "Ra'ayi na ne ya sauya,
yanzu kuma dinkin na ke so." 'Yar dariya Sageer
yayi,"Allah ya nuna mana lokacin." Ya ce ,"Amin.
Ya dan jima nan suna ta hira, sannan ya je ya
gaida Umma. Abba ya riga ya fita kasuwa. Daga
can gida su Zarah ya nufa, suka sha hira da
Innar sa. Haka yayi ta yawon sa a gari, ba shi
nan, ba shi can. Saboda yasan Nusaiba ke da
girki, bai koma gida ba, sai gab da Sallar
magariba. Suna zaune a falo, kowacce ta tsala
don mamaki. Yayi sallama ya shigo, suka amsa
dauke da fara'a, sannan suka yi masa sannu da
zuwa. Idon sa akan Zarah yake amsawa. Kan sa
tsaye ya wuce kujerar da take, ya zauna bisa
hannun kujerar, yayin da take fadin. "Haba
yayanmu, kuma tun safe har magariba ba'a ko
waiwayen gida? Haka ake yi? Kawai yadda take
motsa bakinya, shi ya tsura wa ido,, yake kallo.
Nusaiba ta ce,"Ai ni ban ma san abinda zance ba
Antina." Ya dan lumshe ido kadan, ya bude su,
kafin ya ce, "Na yi laifi kenan? Ta ce,"Tambaya
ma ka ke? Kodayake babu ruwana, tsakanin ka
da amaryar ne. Aron bakin ta na yi, na ci mata
albasa. Bari na yi haramar sallah." Ta mike za ta
wuce, yayi wuf ya cafke hannunta. Adon ta kawai
ke kidima shi, tayi masifar kyau,(Material) din ya
amshi jikinta sosai." Ta waigo a firgece, ta rasa
ma me za ta ce?" Zo in ji warin albasar da ki ka
ara ki ka ci." Ta dubi Nusaiba da ke kallon su,
tana dariya ta ce,"Au dariya ma ki ke yi, ba za ki
kwace ni ba, ki na kallo zai kar ya ni." Ta gintse
dariyar ta ce,"Duk zan iya jinyar ku." Ya janyo ta,
ta fada da karfi ta dawo inda ta tashi ta sake
zama. Ya matso ta sosai, ya ce,"Haba Fati na,,
daga shigowa ta kuma sai ki tashi, don me? Ta
dan kalle shi a karkace ta ce,"Sallah zanyi,ga ta
can ana kira." Ba ta jira komai ba, ta shammace
shi, ta wuce." "Zarah! Ya kira ta, ta waigo. Yayi
dan jim yana kallon ta, kafin ya ce,"Kin yi kyau."
Ta dan kama kugu, ta sauke numfashi ta dubi
Nusaiba,"Kin ji abinda ya ce? To kar ki yarda ya
kallame ki, sai ya gaya miki inda ya je ya ki
dawowa ya ci abincin rana. Ni babu ruwa na." Ta
wuce, ta bar Nusaiba na murmushi. Shi kuwa ita
ya bi da kallo har ta shige sashin ta. Ya ja
gajeran tsaki, wani kullutu ya tsaya masa a wuya.
Ga wacce yake so ya sakata ya wala da ita, ance
ba haka ba. Mutane na ganin auran gata aka yi
masa. Ina gatan? Bayan rayuwar sa na cikin
kunci, bai da walwala ko alama. Can cikin tunanin
sa, ya ji kamar Nusaiba na kunkuni. Ya daga ido
har sun fara ja, saboda damuwa, ya ce,"Mene
ne? Ta ce,"Sannu da zuwa na ce." Ya dai amsa
ne kawai, amma bai ga dalilin sake yi masa
sannu da zuwa ba, bayan sun yi masa tun
shigowar sa. Ta ce,"Shiru ka ki dawowa, muna ta
tararrabi, duk da dai abincin ba cinsa ka ke sosai
ba, ai da dadi ka dan dawo mu gan ka ko saboda
yanayin jikin ka."Yayi shiru yana dubanta,
sanaben da take yi, shi ya sa shi 'yar dariya. Ya
gyada kai,"Yaro man kaza." Ya fada a ran sa. Ta
ce,"Dariya ma na sa ka? "Na dai sa kai na, ai kin
san ba za ki iya sa ni dariya ba. Ko za ki iya? Ta
kada kai,"Wace ni, amma kasan bai kamata ka
rinka dogon yawo ba ko? Ya ce, "Na daina
Hajiyar. Zan iya zuwa in yi sallah? Tayi dan
murmushi, ta ce,"Ruga da gudu, ka yi sallah, ina
nan zuwa da kayan abinci." Kya ci abinki." Ya
wuce yana fadi a ran sa. Ta bi shi da kallo, yanzu
kam ta yarda son Naseer ya fara shiga ranta, sai
bata san abinda ke damun sa ba, ba baya sakin
jiki da ita sosai ba. Ta sauke numfashi ita ma ta
tashi. Ya dade da yin barci tsakar daki bisa
lallausar kafet, lokacin daya ji ana kwankwasa
kofar dakin ya farka firgigi, ya dubi agogo karfe 4
saura kwata na asuba. Tuni Nusaiba ma ta tashi
zaune bisa gado, tana tambaya,"Waye? Bai amsa
ta ba, ya wuce kofa yana fadin ,"Zarah! Menene?
A lokaci guda yana bude kofar. Me zai gani? Wasu
Samudawa ne majiya karfi cikin shigar bakaken
kaya, tun daga bisa kan su har kafafuwa, ba ka
ganin komai, sai kwayar ido. Sun tado Zarah da
bakin bindiga. Ko kafin ya gama shan mamaki,
sun hada da Zarah da kofa tare da shu sun
bankado su tsakar dakin." Ganin haka yasa
Nusaiba ta aza hannu bisa kai, ta kwarara salati
mai karfin gaske! Bata karasa ba, wani daga cikin
su ya kwashe ta da mari. Ya daka mata
tsawa,"Shutu.! Ta rarrafa da gudu ta kwakumi
Zarah, suka dunkule waje daya, bakinta na ta
tsato jini. Naseer ya bi su da kallo ya ce,"Me ku
ke so? Wanda ya fi kowa rashin imani ya dubi
hannun Naseer da ke rataye a wuyansa, yasa
kwafcecen takalmin da ke kafar sa, ya togar
hannun, sannan ya aje kafar bisa hannun ya
murza son ran sa.Daga yadda Naseer ya ji
yanayin hannun, ya tabatar da babu makawa ya
sake karyewa. Amma saboda taurin ran sa, ko
kara bai yi ba, ya sake cira kai ya dubi wanda
yayi dakali da hannun sa, ya ce,"Menene abin
duka bawan Allah? Ina cewa abinda na ke da shi,
su zan ba ku? Magana ta gaskiya, kun yi rashin
sa'a ban da komai gaba daya cikin kudina cikin
gidana na dubu talatin ne, suna cikin jakar can,
ku je ku dauka." Ya maka masa kasan bindiga ya
ce,"karyaKi na yi segiya, ina kudi? "Abinda na ke
da shi na gaya maku." Baba tausayi ya shiga
tafka masa takalmi. Nusaiba tayi karfin hali, ta
durkusa hawaye na zuba murya na rawa ta
ce,"Don Allah ku yi hakuri, ku daina dukan sa,
muna da gwalagwalai masu yawa da tsada, akwai
wayoyi kuma a waje na. Akwai dubu hamsin, duk
zan hada ma ku. Don Allah ku kyale shi, ba shi
da lafiya. Zarah kuwa kamar ta mutu, ko
numfashin kirki bata iya yi. Take nan ogan ya
hada su da yara 2, kowacce aka rakata dakin ta,
ta hado duk abinda take da shi. A wajen Zarah
ma an sami dubu goma ragowar sadakin ta da
Malam Umar ya ce dole sai ta kar6a. Amma
gwalagwalan Nusaiba iyaka ne, domin a cikin su
akwai na dubu dari biyu da hamsin. Ganin su ne
ma yasa ogan 6arayi ya kyale Naseer, ba don
haka ba da sai ya kwashi kashin sa a hannu. A ce
gida kamar wannan, ya 6ata lokacin sa ya shigo
bai sami komai ba? Dole kuwa ya debo rabon sa
a jikin Mai-gidan. Amma duk da haka warwas
suka bar Naseer. Matansa suka tarairayo shi. Sai
a lokacin yaje jin kansa kamar ba a jkin sa yake,
shi yasa ma ya kasa tashi tsawon lokaci. In ban
da kuka babu abinda su Zarah ke yi, shi kuwa
fadi yake,"Hasbinallahu-wani-imal-wakil........
Wasa-wasa fa Naseer ya kasa motsi, abin ya kara
firgita matansa. Nusaiba ta bazama falo ta nufi
gefen da wayar gida take (Land-line) jikin ta na
rawa ido na tsiyaya, ta nemi lambobbin gidan su
a Kaduna. Hankali tashe Alhj Basheer ya dauka,
don ya tabbatar da babu lafiya, wannan waya
karfe 4 da rabi." "Hello." Muryar Nusaiba ya ji
cikin kuka yana fadin. "Abba na! B'arayi sun ku
san kashe Naseer, ga shi can kwance, ya ka sa
motsi! Gabansa ya yanke ya fadi, ya dauki salati,
bakin sa na rawa kafin ya ce,"Harbin sa suka yi?
Ta ce,"A'a tsabar duka ne Abba na. Don Allah ku
taimake mu, sun kwace komai, har wayoyin mu
balle in kira wasu anan. Ya ce,"Ku kwantar da
hankalin ku, kin ji? Zan kira Abban sa, ni ma ina
tafe Insha-Allahu. Ina Zarah take? Ita ma lafiya
ko? Ta amsa,"Eh tana can wajen sa." To shi
kenan, ki koma ku natsu, kin ji? Ta ce,"To." Ta aje
waya tana share hawaye, ta koma dakin ta gaya
wa Zarah ta kira Abbanta. Suna nan zaune, sun
ta sa yayan na su, sun rasa abinda za su yi
masa, kan sa na bisa cinyoyin Zarah. Ya bude ido
da kyau, ya ce,"Mai gadi ya shigo kuwa? Suka
girgiza kai a tare, suka amsa,"Bai shigo ba." "Ko
sun kashe shi ne? Ya kara firgita su. Nusaiba ta
mike,,"Bari in dubo shi." Ta mike Zarah ta riko
ta,"Yanzu ke sai ki fita? Yana daga kwance ya
zura mata ido ya ce,"Lallai ke ba ki da hankali, to
fita, su kashe ki ke ma. Ba ta ce komai ba, ta
dawo ta zauna. Amma a son ranta da sun kyale
ta fita za ta yi, ta dubo lafiyar Mai-gadin su.
Tunda ba su ga ya shigo ba, bayan fitar 6arayin,
tabbas akwai dalili. Wani sabon tausayin su ya
sake rufe ta. Nan da nan hawaye suka tsinke.
Nusaiba akwai tausayi, sam-sam bata son ta ga
mutum cikin wani yanayi na rashin jin dadi, gaba
daya hankalin ta tashi yake yi.
Tun daga Kaduna Alh.Basheer ya debo 'Yan
sanda mota 1, motar sa na gaba, suna bin sa a
baya. Hajiya Zulai tayi shiru tallafe da kuncu bata
tunanin komai, illa tausayin sirikin ta. Allah ya
sakko masa da jarabci kufi da kufi.
.Tayi ajiyar zuciya, ta ce,"Allah ka mayar masa da
alkhairi." Alh.Basheer ya ce,"Amin dai, wannan
Yaro ai sai an mike masa tsaye da addu'a. Domin
ina ji masa tsoron mahassada." Ta ce,"Kai dai
bari. Allah abin tsoro,mutum abin tsoro. Ubangiji
ya raba mu da kowanne irin sharri." Ya sake
fadin Amin. Cikin mintoci 45 suka iso Zariya.
Gidan su Abba suka fara wucewa, suka dauko su
kamar yadda Alh. ya ce su jira shi, yana tafe da
"'Yan sanda. Gari ya fara shaa! Zai waye, suna
iso wa (Hanwa Low-coast). Get din gidan na
bude, shigewa kawai suka yi. Tun daga nan 'Yan
sanda suka fara ganin shaida, domin kuwa Mai-
gadi na daddaure, an like bakinsa banda dan
banzan dukan da ya sha na fitar hankali. A bakin
kofar falo, suka ci karo da su Zarah, wani sabon
kuka suka fashe da shi. Gaba dayan su, su Ummi
suka rungume suna rarrashi, sannan suka
dunguma inda Naseer yake, yana kwance gefen
idon sa ya kumbura sumtum! Wajen da aka buga
masa kan bindiga. Sallallami kowa ke yi. Su Abba
suka tarairayo shi, ya na fadin," "Sun k'ara karya
ni Abba. Sai an sake min dori." Babu 6ata lokaci
suka sa shi a mota zuwa gidan dori, suka bar
'yan sanda na yi wa matansa tambayoyi. Shi kan
sa Mai-gadi tare da shi suka tafi, aka ja masa
targade 3 ajikinsa. Daga can suka kai su asibiti,
don samun magunguna. Karfe 10 na safiya suka
dawo. Gida ya cika. Inna ta dubi Naseer, duk ya
muzanta, ya sauya kamanni. Hawaye fal ya cika
idanuwan ta, ta ce,"Wannan Yaro ka na ganin
tashin hankali. Allah ka yaye mana masifa." Duk
saura suka ce Amin. Kowa ya ga Naseer yadda ya
galabaita, sai ya tausaya masa. Haka Sageer da
Yakubu suka yi shiru, suna masa duban tausayi.
Naseer B kuwa fadi yake cikin ransa,"Ba shi fafa
ba? Ya wani fito da mota mai nishi, yana kece
raini a gari. Ba dole 6arayi su biyo shi ba. Ai ga
irin ta nan. Allah sarki, ko alama Naseer B bai yi
wa takwaransa halacci ba. Da Naseer zai gane
daya tabbar da cewa lallai ba k'aramin sa'a yayi
ba a rayuwa, tunda har Allah yayi masa baiwar
da wani yake kallo, yana masa hassada." Bayan
sallar azahar iyayen su suka koma gidajen su.
Alh.Basheer kam ya kara jaddadawa Malam
Balarabe maganar nemar wa Naseer taimakon
addu'a. Malam Balarabe, ya san yana yi masa
cikin sallolin sa , farilla da nafila, amma duk da
haka, ya amsa wa Alh. Basheer da lallai za su
kara kaimi shi da Umman sa. Shi kuwa Naseer
bayan tafiyar kowa, yana zaune bisa Canis kafet.
Falo jingine da kujera. Su Zarah na kicin suna
wanke-wanke. Ya kwala mata kira ta zo. Ya dube
ta fuska daure, ya ce,"Ki je maza daki, duk
abinda ki ka san nawa ne, ki zuba min a jaka. Ke
ma ki hada da na ki kayan za mu koma Tudun
Wada? "Saboda me? "Saboda ra'ayina can ya
koma. Ta kada kai, "A'a yayana, 6arayi sun firgita
ka, kawai za ka ce. Amma ni ban ga dalilin
komawar mu Tudun Wada ba." Haushi ya kama
shi ya ce, "Eh haka ne, koma me za ki ce. Za ki je
ki hada min kayan, ko in tashi da kai na? Ta
kwala wa Nusaiba kira, ya 6allo mata harara ya
ce,"Ke na ce ki hado kaya, ina ruwan ki da ita?
Bata tanka masa ba har Nusaiba ta iso,"Menene
Antina? Ta ce,"Ki zo ta mu ta same mu. Yayanmu
ya ce mu hada kayan mu Tudun Wada za mu
koma." Saboda me? Kafin ta ba amsa. Naseer ya
yi kukan kura ya tashi ya bar falon. Suka bi juna
da kallo, kafin Nusaiba ta matso kusa da Zarah,
ta ce,"Me ya faru Antina? Fuska yamutse ta
amsa, "Ooho, amma zai wuce maganar 6arayin
nan ne? Ni ma shi na gani, zo dai mu je mu same
shi."Cikin daki Naseer ke ta hada kayansa da
hannun daya, cikin jaka. Gaban sa suka tsaya
Zarah ta fara cewa,"Yanzu yayanmu da gaske ka
ke yi? Ai da ka san haka ne, sai ka tada maganar
a gaban su Abba ka ji me za su ce? Ya ce,"Kuma
shi kenan ba ni da wani ra'ayi nawa, komai sai
an takura ni? Ba zai yuwu ba, kin gane ko? Ke ba
ki da wata hujjar ma da za ki ce ba za ki koma
Tudun Wada ba. Gara wannan ita nan gidan
Babanta ne, ko bata biyo mu ba, tana da hujja.
Idan kuma duk anan za ku zauna, ba matsala, na
gama magana, kar wace ta sake yi min wata." Ya
suri jaka yayi waje. Su kuwa sansarai suka tsaya
suna kallon ikon Allah, duk jikin su yayi sanyi, ba
ma kamar Nusaiba, domin kalaman Naseer ba su
yi mata dadi ba. Hawaye suka cika idon ta, ta
dubi Zarah ta ce,"Antuna, me yasa yayan mu ke
fadar wannan maganar ko gidan Baba na ne,
zaman wa na ke yi a cikinsa? Hasalima Abba na
bai ce ni ya ba gida ba." Zara ta kamo ta cike da
tausayi, ta ce,"Kar kiyi kuma amarya. Ba wani
dalili yasa yayan mu wannan abin ba, illa firgici
6acin rai." Ta ce,"Amma ai mu yakamata ace mun
shiga wannan halin ba shi ba." Koma dai
menene, ki manta kawai amarya, yanzu menene
abin yi? Ta ce,"Abin yi bai wuce mu bi shi ba,
duk abinda Abbansa ya ce, shi za'ayi ko? Shi
kenan, je ki hado 'yan kayan bukata, mu
tafi."Kowacce ta nufi dakin ta. Nusaiba kam
jikinta a salibe yake akan maganganun Naseer,
musamman da ta tuna da hudubar Abbanta
kafin a kawo ta gidan miji: "Nusaiba, babu
abinda za ki yi a rayuwar ki gaba daya a halin
yanzu, wanda ya fi biyayya ga mijin ki. Ki sani da
Ummanki da ni Alh.Basheer, ba mu da ikon
komai a kanki, saboda girman darajar aure. Sai
abinda mijinki ya hukunta akanki. Saboda haka
Nusaiba kar ki dauki aure da wasa, ki yi amfani
da ilimin ki, domin a yanzu ne yake da amfani a
gare ki. Magana ta gaba wacce na ke son gaya
miki, ita ce, koda wasa ban lamunce miki yin
wata magana akan abubuwan da na mallaka wa
Zarah da mijinku ba. Ina nufin gori, da babbar
murya na ke miki wannan maganar. Duk ranar da
ki ka gorantawa daya daga cikinsu, ban yafe miki
ba, domin kin watsar da mutuncin ki, kuma kin
rusa tarbiyar da muka baki. Ba kuma sai na gaya
miki ba, kin san matsayin matar da ta yi wa
mijinta gor.......... Ta share hawaye, ta zage zif
din jaka, tana fadi a ranta,"Har abada ba zan
baka kunya ba,"Abbana." Muryar Zarah ta jiyo
tana fadin,"Amarya kin gama? Ta amsa, Eh. Suka
kwaso kayan bukata, suka kulle ko'ina, suka fito.
A zaton su Naseer na waje, yana jiran su, tunda
ba su ji tashin mota ba. Ashe shi tunda ya fito,
ya tako ya tsare aca6a, ya haye yayi tafiyar sa.
Mai-gadi ke gaya ma su tuni ya fice. Kallun juna
suke yi baki sake. Dole Nusaiba ta koma ta dauko
makullan motar ta, ta ja suka bi shi. Ita Zarah ta
san rigimar Naseer, shi yasa, ma abin bai dame
ta ba. Nusaiba kuwa abin 2 ya hade mata,
damuwar da Naseer ya shiga, ga kuma
maganganunsa, ba su yi mata dadi ba. Sannu a
hankaki Zarah ke ta warware mata kullin zuciyar
ta, ta hanyar dibar ta da labaran wasu abubuwan
da Naseer din yayi na jarunta. Al'amarin kuma ya
koma daure mata kai. Ta saki waccan maganar,
ta koma tana tambayar kan ta, me yasa yau ya
tashi hankalinsa haka akan 6arayi? Zarah ma oho
ta ce, shi yasa har suka iso kan ta na daure. Suka
yi sallama cikin gidan dauke da jakunkunan su.
Umma ta fito ta tar6e su,"Ku shiga yana nan
falo. Ko kunya bai ji, wai ya taho ya baro ku can.
Naseer ai baya gajiya da abin fad'i. Yana zaune
gaban Abba suka zube suka yi gaisuwa. Malam
Balarabe ya dube shi, ya nuna su "Yanzu ba ka ji
kunya ba? Koma menene, ai sai ka hado matan
ka ku tahu tare, kai dai kullum bahagon mu2m
ka ke. ba ka sauyawa. Wai ma in tambaye ka,
me ka ke nufi da kun baro can? Rai 6ace ya
ce,"Ni fa gaskiya Abba ba zan zauna gidan nan
ba. B'arayi na ganin bangajejen gidan suna
shigowa ba sa mun komai, wata rana kashe ni za
su yi, kar fa ka mance Abba ni fa ba mai kudi
bane, rufin asiri ne kawai. Saboda haka nan
zamu zauna, idan ina son asirina ya kara
rufawa.Malam Balarabe yayi dan shiru, saboda
Naseer yana da dalilai masu karfi. Can ya dan
nisa ya ce,"To ka gaya wa Alhj ko? Ya kada
kai,"Ban gaya masa ba." Umma ta amsa,"Ka ji
matsalar ka, tunda ya zo yakamata ka yi maganar
nan a gabansa, amma ka ki, me zai ce? Malama,
ni ban goyi bayan zaman su anan ba. Su koma.
Ya kira Alhjn a waya, ya gaya masa tukuna." Ran
Naseer ya k'ara 6aci, ya zuba wa Ummansa ido,
tunanin sa kuwa, shi kenan kuma yanzu ba shi
da wani ra'ayi, sai abinda Alhj ya ce, ya runtse
ido, ya cije le6e,"Na shiga uku. Alhj ya mallake
min iyaye. Ya fada cikin ran sa. Ya bude ido, ya
dubi Umma,"Gaskiya Umma, sai dai ki yafe min,
na riga na baro Hanwa, ba zan koma ba, Idan
kuma ba kya son rayuwa ta, shi kenan, zan kai
kaina a kashe." Nusaiba tayi wuf ta ce,"Umma,
ku kyale mu mu zauna anan din. Ni na san Abba,
ba zai ce komai ba. Kuma kula da kaya, ai ya fi
ban cigiya. Tunda yana ganin nan zai fi mana
sirri, sai mu zauna, ko Antina? Ta ce,"Gaskiya
ne,Umma ku kyale shi kawai."Umma ta nisa
kafin ta ce,"Ka ji Malam, yanzu wa zai kira Alhjn
yayi masa bayani?" Ya ce ,"Shi mana. Ba shi ke
da uzirin ba? Je ki dauko masa makullin sasan su,
su gyara."Umma ta mike, ta wuce dakin barci.
Malam Balarabe ya ci gaba da fadin,"Ka dauki
waya yanzu-yanzu ka kira shi, ka gaya masa." Ya
dauko wayar sa ya mika mai,"Ungo yi anmfa da
tawa." Yasa hannun hagu ya amsa yana neman
layin. Umma ta kawo makullan, ta mika wa
Zarah. Ta kar6a suka fito tare da Umma. Tsarin
ginin yayi matukar burge su, musamman
Nusaiba. Ita kan ta, ta tabbata babu laifi Naseer
ya kashe wa gidan kudi. Umma ta kawo tsintsiya
da abin goge-goge, ruwa cikin bokiti da Omo.
Nan da nan suka gyara wuri ko wacce ta za6i
dakinta. Alh. Basheer kuwa abin dariya ma ya ba
shi. Nan take ya yanke hukuncin ya ce duk su
zauna har zuwa lokacin da hankalin su zai
kwanta. Babbar mota yasa Sageer ya samo, su
Zarah suka je suka kwaso iya kayayyakin da zasu
iya debowa. Suna ta aikin gyaran Waje. Umma na
taya su. Shi kuwa dan gogan yana kwance
karkashin inuwa inda aka zuba masa shimfidar
karamar (ChaniS Carfet) suna hira da Sageer. "Ai
ni ban san cewa kai matsoraci bane, sai yau.
Ashe gaba da gabanta. Aljani ya taka wuta. A
taurin rai irn na ka, ban ta6a zaton akwai abinda
zai hana ka sukuni ba." Yayi wata 'yar dariya, shi
kadai ya san ma'anar ta, kafin ya ce,"Kowa ma
hakan yake fadi, dazun nan Inna ta zo ta gama
min tsiya. Amma ka san wani abu? Ina sane da
abinda na ke yi. Kawai yarinyar nan na ke so na
kure, a zato na za ta ce ba za ta biyo ni ba, ko
iyayen ta. Ka ga na sami wata kafar taso da
rigima. Sai kuma ta ba ni kunya mayyar." Wani
zabgegen tagumi Sageer yayi, yana kallonsa, wani
haushi ya kama shi, ya jima kafin ya ce,"Ni kai
na da ni na aikata ba na ji kunyar. Yanzu kuma
sai yaya? Ya ce,"Haushi ka ji? Idan ba na yi, ina
nuna ni ma na isa ai raina ni za'a dama ta samu
kuwa, dole in yi amfani da ita tun kafin yarinyar
nan ta yi min gori waya rana. Ka san mata. Ni
ban damu da shirgin ta ba, ta nemi ta raina min
wayau." Sageer ya kada kai, ya ce,"Duk rashin
soyayyan ta ya kawo wannan matsalar. Saboda
haka magana ma 6ata baki, sai dai a kullum ba
zan daina gaya ma ka, ka bi a hankali ba. Ni zan
koma. Allah ya k'ara lafiya, ya kuma tsare na
gaba." Ya ce,"Amin." Je ka, kai dama ai ba abokin
kuka bane." Na ji, a nemi abokin kuka a gaya
masa, ranar da ta dariya ta zo, kar ace an san
mu." Ya mike ya wuce, yayi sallama da Umma da
su Zarah. Suka yi masa godiya, ya fice, ya bar
gidan, ba tare da sun sake cewa juna affan ba,
shi da Naseer.
¤¤¤¤¤¤¤¤¤¤¤¤¤¤¤¤¤
BAYAN WATA BIYAR
a hankali Nusaiba ta fara fahimtar irin zaman da
su ke yi da Naseer, tamkar zaman doya da manja
ne. Haka ya bata daman gane banbancin karara
yake nunuwa tsakanin ta da Zarah. Al'amarin ya
soma damunta, saboda ta ka sa gano dalilin da
yasa hakan ke faruwa? Su kuwa iyayenta a
kodayaushe kokarinsu ta zauna gidan mijinta
tana mai ladabi da biyayya. Watannin 5r kenan
da barin su Hanwa, kuma tuni hannun Naseer ya
warke, amma Alh. Basheer ko Umminta babu
wanda ya sake ta da zancan su koma can. A
tunanin su babu komai, tunda suna jin dadin
zaman su anan Tudun Wada, kusan duk
abubuwan da aka sace masu, sun maida masu
sabbi. A yanzu ba abinda Alh.Basheer ya fi maida
hankali a kai, shine ya g a Naseer ya koma
makaranta sosai,hankalinsa ya karkata ga
karatun sa, akan ya dawo wasa gadan-gadan. Shi
kuwa Naseer kallon hadarin kaji yake wa kowa.
Komai aka ce yayi, sai ya nishadantu sannan yayi
shi. Shi a dole da kan sa yake so ya ja akalar sa.
Safiyar wata juma'a Zarah ta tashi da wani
azababben zazza6i mai dafa jiki. Hankalin
Nusaiba ya tashi lokacin da ta shigo dakin, don
ganin yaya Antinta ta kwana? Nusaiba ke da girki,
kuma wannan al'adarsu ce kullum safiyar su
binciki yadda dayansu ya kwana. Wannan
halastacciyar dabi'a mai kyau ce, kuma hakan shi
ya wajabta ga kowanne musulmi a hakkin zaman
tare. Da gudu ta koma dakin Naseer, barci mai
dadi ne ya dauke shi. Bata san lokacin da ta dasa
hannunya a jikin sa ba, ta hau bubbuga shi,
"Yayanmu! Yana ji, ya kyale, haushi da takaici
duk suka yi masa bargo. Idanuwanta suka kawo
kwalla, muryar ta, ta soma rawa,"Yayanmu, don
Allah ka tashi,"Antina ba lafiya......... Bata gama
fada ba, ta ga yayi wufe ya mike, ita da ke duke
gefen gado har ya riga ta ficewa. Ta biyo
bayansa, cikin sauri ta iske shi a dakin. Bisa
gadon ya haye, ya yaye bargon yana kira. "Zarah!
Menene? Jikinta yayi zafi sosai, tana rawar sanyi,
ta kasa magana. Ya rumgumo ta jikinsa." Zarah!
Bude ido ki dube ni, ina ke miki ciwo? Da kyar ta
iya fada,"Zazza6i.""Tun yaushe? Ta ce"Da shi na
kwana. Ku kai ni asibiti." Idanuwan sa suka kada
nan da nan. "Haba Zarah, ya za ki kwana da ciwo
ba ki yi Magana ba? Ai haka babu kyau. Zarah
menene amafani na a gidan nan? Hawaye suka
tsunke wa Nusaiba, ta juya da gudu, tayi waje ta
nufi sasan su Umma. Shi kuwa Naseer tuni ya
kule, iya wuya. Duk yadda yake ji da matarsa, ace
ta kwanta cikin wani hali babu taimakon kowa,
alhali yana cikin gidan nan da ransa. Me ya jawo
wannan, in banda zaman Nusaiba cikin gidan
nan. Ba don haka ba, me zai nisanta shi da abar
son sa na tsawon awa daya balle a kai ga kwana?
Har ta kwana yashe ita kadai cikin mawuyacin
hali, abin tausayi. Ya runtse ido, tamau, kamar ya
kwarma ihu. Tabbas an rusa masa shirin tsarin
rayuwar da ya ci burin yi da Zararsa. Ya kuwa
zama dole ya tsani duk wanda ya zama sila ko
shi waye. Muryar su Umma ya ji suna fad'in, "Ka
zauna ka rike ta a daki? Asibiti ya kamata ayi
maza-maza a kai ta." Umma ta amso ta daga
hannun sa, suka shirya ta tare da Nusaiba. Suna
tafe a mota, yana k'ara wa kan sa zafi da
tunanin abinda ba shine ba, a iska yake sawa
ransa kunci, har ya soma sambatu cikin zuciya.
"Gaskiya ina son na sake da mata ta. Wannan ai
cutarwa ce." Ya daki sitari tare da ajiyar zuciya.
Umma ta ce,"Je ka a hankali Naseer, za ta sami
sauki da yardar Allah." Sun ga Likita, ta sha
bincike da gwajegwaje, sakamako ya fito k'arara
Zarah na dauke da ciki wata 2 cif. Ba karamin
girgiza Nusaiba tayi ba, kuma take nan ta
warware wa zuciyarta sark'ak'in da ta shiga na
me yasa Naseer yake nuna bambanci a tsakanin
su? Amsar kawai baya son ta ne. To me ya sa ya
aure ta? Tambayar da bata gano amsar ta ke nan
ba, har suka dawo gida. (Tofa me Nusaiba take
nufi




Zaharaddeen Shomar
Whatsapp  08168575100




Ajininsa yake 2-03
Posted by ANaM Dorayi on 11:45 PM, 11-Nov-15
Under: Ajininsa yake
_______ NA ZULAIHAT SANI KAGARA_______.
.
. Cikin Zarah wata 3 kenan har yanzu ba wata
lafiyar kirki ta cika ba. Duk ta rame ta dushe.
Gaba daya ayyukan gidan Nusaiba ta dauke
mata, ga shi kuma tana kula ita sosai, a lokutan
da Naseer baya gida. Sai dai tsakanin ta da shi
ido ne kawai. Ba wai abubuwan da yake yi ba sa
damun ta ba ne. A'a kokari take yi tana hadiye
wa, saboda farin cikin Abbanta. Shi kuma Naseer
matsalarsa ke nan, rashin nuna damuwar ta, so
yake ya cusa mata, ta ji haushi ta nuna 6acin
ranta a fili. Amma ko alama ta ki. Yau yana
Kaduna don amsa kiran Alh. Basheer. A offi ce ya
same shi. Yayi gaisuwa kamar yadda ya saba.
Alhj ke fad'in,"Saura kwana hudu mu tafi Katsina,
ban ga ka na zuwa atisaye ba, kamar yadda ka
saba? Ya shafa keya, ya sunkuyar da
kai,"Kodayake ku manya ne, ba ha bukatar
atisaye." Ya kada kai,"Ba haka bane Alhj. Ka san
jibi za'a fara rubuta (External WAEC), ina zuwa
wasu 'yan (Lesson) ne shi yasa, "O.K." na ji. Yana
da kyau haka. Za ka sami zuwa Katsina kuwa? Ya
ce,"Watakila in sami zuwa, sai dai na duba (Time
table) tukuna." To Allah ya bada sa'a." Amin." Ya
amsa. Yayi shiru, kamar wanda ruwa ya ci. Da ka
kalle shi, ka san a susuce yake. Alhj kan sa ya
gane hakan, shi yasa yake ta kallo sa. Jim kadan
ya dago, ya dube shi, suka hada ido, ya ce,"Zan
karasa wajen su Yakubu.Ya ce,"To shi kenan.
Daga can za ka wuce gida ne? Ya mike yana
fad'in, "Eh!" A gashe su don Allah." "Za su ji." Ya
wuce. Alhj ya raka shi da kallo. Kai bai yarda ba,
akwai abinda ke damun Naseer, don haka har ya
kai kofa, ya kira shi, ya dawo ya ce da shi,"Zauna
Naseer." Ya ja kujera ya zauna. Alhj Basheer ya
dube shi da kyau ya ce,"Naseer ni na gaba daya
ka sauya min. Ba ka da kuzari kamar yadda na
san ka. Me ke damun ka? Gaya min." Yayi dan
yake ya ce,"Babu komai Alhj." Ya ce,"A'a ban
yarda ba. Look Naseer, ni Babanka ne na dauke
ta tamkar dan na haifa a ciki na. Kar ka 6oye min
komai, idan akwai abinda ke damun ka, ka gaya
min, muddin bai fi karfi na ba, zan maka
maganin sa." Ya sake girgiza kai ya ce,"Allah, Alhj
babu komai." Yayi jim, yana kallon sa kafin ya
numfasa ya ce,"Shi kenan, ina sauraron ka, idan
dai ka ga da matsala tafiyar nan, mu na iya dage
wasan har zuwa lokacin da za ku gama (Exams)
din, ko me ka ce? Ya ce,"To zan duba in gani." Ya
mike,"Zan tafi." Ka gaida Abban ka da kyau." Ya
wuce yana amsawa, Alh. Basheee yayi shiru,
yana tunanin, amma sam ya kasa gane kan
al'amari, ga shi a zahiri ya san Naseer ya canza,
ba haka yake ba, musamman idan suna da wasa,
ya fi kowa kosawa a tafi. To ko har sha'awar
wasan ma aka cire masa a rai? Ya tambayi kan
sa. Wani sabon tausayi ya lullube shi, ya
ce,"Allah ka shiga tsakanin mu da makiyan mu."
Shi kuwa dan gogan tafe yake, yana mamakiin
yadda aka yi ya koyi shara karya. Shi da ko biyan
kudin jarabawar bai yi ba, amma yayi ruwa yayi
tsaki akan zai rubuta jarabawa. Yayi dan
murmushi, ya ce,"Allah ka shirye ni." Ya jima
wajen su Yakubu, suna ta hirarrarkin duniya,
sannan ya baro Kaduna, ya dawo Zariya. Kai
tsaye shagon dinkinsa ya wuce, ya iske Sageer na
zaman jiransa."Dariyar me ka ke ta faman yi ne
haka? Ya jawo wata dirowa, ya dauko ambluan ya
mika masa,"Ta mece ce? Ya ce,"Kai dai bude. Ka
gani." Ya bude, ya duba sannan ya dube shi baki
sake." "Teaching ka samu a (Barewa College)."
Yaushe Appointment din ya fito? "Dazu aka kira
ni, aka ba ni. Ban dade da dawowa ba. Ina
samun (Part-time) kuma zan wuce in ci gaba da
Digree dina. Yayi murmushi ya ce,"Ka haye Yaro."
Allah ya sanya albarka." Amin." To kai ya bayanin
karatun? Yayi dan tsaki,"Zan yi mana." Kullum
haka ka ke cewa har an gama biyan kudin
(External) ka na kallo, ka ki biya. Me yasa saboda
Allah? Yakamata ace rashin son karatunka tun na
yarinta ya wuce." Ya ce,"Ni na gaya ma ban son
karatun ne? Kawai haushi aka ban, na fasa." Ya
6alla masa harara,"To wa kai ma wa? Ya ce,"Kai
nai mana." Bata yuwuwa haka Naseer, abinda zai
amfane ka, har wani zai ba ka haushi ka fasa?Ya
ce,"Zancan ka ke so. Ai ni ma na san abinda na
ke yi., Wai don ranin wayau, sai da zai ban 'yar
sa yake tambaya ta, ya maganar karatu? Diploma
gare ka ko Degree? Ya fadi yana kwaikwayon
salon maganar Alhajin. Sageer ya tsura masa,
ido,"Ba ka da kunya Wallahi, sirikinka? Ya ce
,"Kyale ni, lokacina na ke ci. Duk lokacin da na
nishadantu, na koma makaranatar! Kai me ma
sunan ka? Kullum mancewa na ke." Ya tambayi
cikin yaran shago. Ya ce,"Abbas." Yawwa Abbas,
kwaso min kayan koyon dinkin nan, ka ji? Ya tashi
yana fadin,"To." Ya dubi Sageer ya ce,"Yanzu fa
sai ka ji haushi na ko? Wai me yasa ba ka goyon
baya na ne? Yayi dan tsaki mai dauke da takaici,
ya mike ya koma bisa keken aiki, ya ci gaba da yi
wa kayan gaban sa aiki." Yayin da Abbas ya kawo
wa Naseer kayan koyon dinkin sa. Maida su
kawai, maida su." Yaro ya juya da su. Shi kuma
ya mike, ya fice daga shagon yayi gida."
**********************
Zarah na jingine da gado. Nusaiba na bisa
Kujera, suna ta faman hira. Sallamar yayansu
suka amsa. Sannan suka hada baki yi masa
sannu da zuwa. Wajen Zarah ya nufa, ya zauna
bakin gadon ya sumbaci kuncinta, ya ce,"Zarah ta
kenan. Maman Bebi ya kike? Ta dan kirne fuska
rumgume da hannayenta a kirji, ta zura masa
fararen idanuwanta da su ka kara tabbatar yana
yin da take ciki. Shi yasa take kara masa kyau.
Yayi murmushi sosai, ya sake fadin,"Bebina ya
kara miki kyau, ba ki ga yadda ki ka dawo ba.
Balarabiya sak! Yana sa aya. Nusaiba ta mike ta
bar dakin." Ya bita da kallo har ta fice, sannan ya
maido da fuskar sa ga Zarah, ya ja dogon hancin
ta, ya ce,"Me ki ke marmari, in je in nemo shi?
Ta ce,"Abinda ka ke yi ba shi da kyau, kuma baya
min dadi, kullum ina gaya maka zancan nan. Ga
shi nan tun bata jin haushi, yau ka kure ta. Ya ja
ha6arta, ya ce,"Shine ki ke 6alla min harara? Ba
zan yi wasa da mata ta ba? A wane nafsin aka
haramta min hakan? Ta ce,"Ba'a haramta maka
ba, amma an umurce ka da dalci, kuma an
wajabta maka shi. Gaskiya ba na son abinda ka
ke yi." Ya dan mari kuncinta, ya ce,"Ni ina so, ba
ki ji dadin da na ji ba yau, ba na bata haushi."
Ta dan lumshe ido, ta kauda fuska." Nusaiba ta yi
sallama. Zarah ta amsa. Ta shigo dauke da tire
karami. Ruwan sanyi ne da Jus na kwali da
kofuna 2, ta aje gaban sa. Yadda ya zura ido,
yana kallon ta, tana zuba masa ruwa. Shi ya ba
Zarah dariya. Ta gode Allah da Nusaiba ba
haushi ta ji ba, hasali ma ruwan sanyi ta je kawo
masa ya sha, ya ji dadin rashin adalci." Ta sa
hannu ta, ta mintsile shi, ya dan zubara, ya dube
ta. Ta daga gira, tana masa murmushi mugunta.
Ya juya kan Nusaiba, ya ce,"Daina zuba ruwan
nan, ba sha zan yi ba. Ta aje, ta mike ta
ce,"Antina bari in je in dan kwanta, tunda ga
yaya na nan ko? Ta ce,"Ayi barci lafiya amarya."
Bata saurari komai ba, ta koma dakin ta, ta
kwanta tana ta sake-sake har barci ya sace ta.
*****************
Yana zaune a shagon dinkinsa, baya aikin
komai, alhalin suna da wasa A Kaduna, amma
ya ce wa Alhj ana neman su a makarantar da ya
ce ya samu. Sageer na ta dinkin wata atamfa.
Naseer ya katse shi da tambaya. "Ban gane
bane, kodayaushe yarinyar nan ta kawo dinki,
sai ka aje na kowa, ka kama na ta. Ta fi sauri
biyan kudi ne?" Yayi 'yar dariya, ya ce,"Sa'ido
kuma ka koma?" Fa'iza ai kostoma ta ce, dole in
yi mata dinki." Ya kalle shi a dage,"Amma kai ba
karamin dan rainin hankali bane,"Don tana
kostomar ka, sai ka aje dinkunan da suka yi sati
4, ka kama wanda aka kawo jiya? Jiyan ma da
yamma." Fada ka ke min, kome? Ya ce,"Ban
sani ba. Bari kuma ta zo, sai kun gaya min
abinda ke tsakanin ku, kafin a bata dinkin nan.
Ina nan ina jiranta." Sageer yayi wata bazawarar
dariya,"Ashe za ka kwana anan. Kai idan ma ka
ban haushi, sai in kai mata gida, in ce ta bar
kudin." Ya nuna su Abbas,"Ka ga 'yan yaran
nan? Su za ka yi wa barazana, ba ni ba. Za to
zo ta same ni, ka san halina, ban kyalewa." Ya
dan kura masa ido, sannan ya baro inda yake,
ya zo wajen sa ya kamo shi,"Zo ka ji wata
magana." Ya fizge hannun sa,"Babu abinda zan
ji Malam." Ya jawo shi da karfi."Taso mana, wani
sirri za mu yi.". Ya taso suka fita waje. Me yaran
2 za su yi, ba dariya ba, suna wa juna
rad'a,"Yau an k'ure oga Sageer." Suna fita.
Naseer ya ce,"Yi sauri ka fadi abinda za ka fada,
in koma." Ya ce,"Don Allah kar ka yi min fallasa
gun yariyar nan." To menene na aje dinkin wasu
ka yi na ta? Ya ce,"Gaskiya sonta na ke yi, ta
kuma jima tana kawo min dinkunan ta da na
'yan gidan su, amma ni ban yi karanbanin gaya
mata ba." "Saboda me?" Ina tunanin wasu
abubuwa ne. Ka ga bai kamata in fara neman
yarinya ba. Tunda ba aure na shirya yi ba.
Amma yanzu zan taya, in gani idan tana so, shi
kenan." Ya kai masa duka a kafada, yana 'yar
dariya." Shine za ka dame mu da cuwa-cuwa a
shago, ai gara a gaya mata, mu san cewa ta mu
ce. Ka ga ko ni, sai in dinka, bari, mu je ka
gama dinkin, a sa a leda mu kai mata gida. Ka
san gidan na su? 'Yar layin Rimi ce." Ba matsala.
Allah yasa kar ka sha kaye." Daina fadi, kar ka
sani hawan jini." Suka dawo ciki, suna dariya
tare da tafawa. Karfe 6, dai-dai, suna dawowa
daga layin Rimi. Cike da farin ciki Sageer yake,
domin Fa'izah bata ba shi kunya ba. Da hannun
bibiyu ta kar6i tayin sa. Kusan ita ma ta dade
da kaunar Telanta Sageer cikin ranta. Kofar
shago suka yi fakin, lokacin da wayar Naseer ta
dau kuka, ya zaro ta, gaban aljihu ya duba.Tsaki
yai, ya mika wa Sageer, ya ce,"Don Allah gaya
mata na bar wayar caji ne a shago." Ya amsa,
yana dubawa, sai ya ga sunan Nusaiba. Ya dube
shi a yamutse ya ce,"Ban gane ba? Ka san
abinda ke faruwa a gidan? Kuskure ne wannan.
Naseer ka daina." Wayar ta katse. Yana can
yana tunani. Gaskiya ne kuma, haka banza
Nusaiba bata kiran sa a waya. Shi yasa tana
kara daukar ruri, ya figi wayar a hannun Sageer,
ya danna O.K. Ya sawa kunnan sa, "Menene?
Murya na rawa, ya ji tana fadin,"Jikin Antina ya
rikice, ka zo a kai ta asbiti." Ido waje ya aje
waya, yayi wa mota key, ya ja ta a guje."
Menene? Sageer ya tambaya. "Wai jikin Zarah
ya rikice. Ka ji ba...........?" " Yi shiru haka, don
Allah." Ba zan yi ba, kai gaskiya ce ba ka so, ba
kuma zan daina gaya ma ba." Yayi banza da shi,
yana ta surutun sa. Baya ma jin abinda Sageer
ke fadi, don ba shine damuwar sa ba. Yana
fakin kofar gida, ya fito cikin sassarfa, ya fada
gida. Sageer ya biyo bayansa. Suna tare da
Umma a dakin Zarar, sai murkususu take, ciwon
ciki da mara, nan da nan suka dunguma asibiti,
ko kafin su isa, jini ya tsinke mata, shi yasa
suna zuwa dakin 'yan 6ari suka wuce da ita.
Hankalin kowa ya tashi, ba kamar Naseer da
yake jin zuciyar sa na kokarin tsago kirjin sa.
Saboda tsabar firgicewa. Haka idanuwan
Nusaiba ya raina fata, tana zaune ta cusa kai
cikin guiwa. Addu'a kawai take yi, kama-kama
har bayan isha'i, sannan cikin dan wata 4 ya
fita.Idanuwan Naseer suka yi ja, amma jin Zarah
na nan lafiya, sai yayi wa Allah godiya. Anyi
mata wankin ciki, ta dan hutu zuwa tara da
rabi, na dare, suka dawo gida. Washegari
Nusaiba, ta hado kayan karin safe, ta shigo
masu da shi dakin Zarah. Tana zaune gefen
gado, ta dubeta, ta ce,"Mun yi waya da Kausar
dazu, ta ce, in gaishe ki, su Ummi ma ta ce za
su zo anjima." Ta ce,"Ina amsawa. Kausar ta ba
mu kewa, tunda muka dawo nan, ko ta leko
mu." Ta ce,"Kausar ai ba mutunci, da anyi
magana, ta ce karatu." Tana da gaskiya." Ba
wata gaskiya Antina, ke dai sakko mu karya." Ta
jefa filon kujera bisa kafet, suka fara karyawa.
Naseer ya shigo ya dau wanka, kananan kaya ya
sanya. Ya zauna gefen gado. Zarah ta hada
masa Tea ta mika masa. Ya kar6a yana sha,
suna 'yan hirarraki tare da Zarah. Wani lokacin
Nusaiba kan tsoma baki, musamman idan ta
fahimci Naseer ya ya6o mata magana. Bai tashi
a dakin ba, sai da Inna ta zo duba jikin Zarah.
Kwarai ta ji dadin yadda ta same su. Ba ta jima
da zuwa ba,"Direba ya kawo Ummi. Sun dade
suna hira a dakin Zarah, kafin Ummi ta koma
dakin Nusaiba, suka gana tsakanin da da
Mahaifi..
*********************
Shekara guda da rabi kenan da auran su, sau 2
Zarah na samun ciki, yana zubewa duk da
dabarar da ake mata a asibiti na daure
mahaifarta, saboda sun gano ita ce bata da
karfi.Da zarar cikin ta ya kai wata 4, sai a daure,
amma kash! Yana kai wa wata 5r, dole a bude
ta, don samun lafiyar ta. Zuban jini kamar
famfo, har sai cikin ya fita. Wannan shine ciki na
3n, kuma an daure mahaifar har bata hutu a
asibitin watau (Bed rest). Wata 2, ta samu, bata
aikin kome, illa ta ci, ta sha, tayi wanka ta
kwanta. Kusan Naseer a asibitin nan ya tare a
'yan tsakanin nan, musamman da ya ga cikin ya
tsaya har ya kai wata 6 da shiga na 7. Zaran
kuwa zaman asibitinya ishe ta, ta damu kwarai,
tana son su sallame ta, ta koma gida. Yau
Naseer na Kaduna. Suna da wasa. Dole ce ta sa
shi tafiya wasan, domin yau lahadi ce babu
wata karyar da zai wa Alhaji. Ta karatu. Nusaiba
ke tare da Zarah a asibiti tun safe. Abincin da
soye-soye kala-kala tayo mata, irin wanda take
sha'awar ci. Musamman (Cole-slow), tana
bala'in son cin sa fiye da komai, ga shi Nusaiba
ta iya yin sa, yadda ya kamata. Shi take ci.
Bayan sallar azahar, hira tayi hira har suka fada
zancan zaman ta asibitin. Ita ta fara
fadin,"Asibitin nan ya ishe ni amarya, amma
kowa ya ki bada goyon baya, in koma gida ko na
dan sakata, in wala." Wata 'yar harara ta sakar
mata,"Lallai Antina, da wa ki ka so ya goya miki
baya?Ki na ganin an fara samun nasara, muna
ta murna, shine za ki ce gida za ki." Ta
ce,"Koma ke ki ke zuga yayanmu, kullum yana
like da Doctor suna kus-kus? Ta ce,"Allah ko
daya. Amma Ubangiji yayi wa mai zuga shi
albarka. Me za ki zo ki yi a gidan? Ta nuno ta da
cokali." Ki na son in kwashe hakoran ki kenan,
kin san na koya wajen yayanmu." Tana 'yar
dariya ta ce,"Allah Antina a daina maganar
wasa, zaman ki anan yana da muhimmanci, su
Doctors din ai sun san abinda suke ji." Tayi dan
tsaki,"Don dai ba ke ki ke zaune wajen nan ba,
shi yasa. Wai ma to ko a gidan na ke, aikin me
zan yi? Taimakon da ki ke min, ai iyakar sa
kenan, ko Inna hakan za ta yi min. Ga mai
wanke-wanke Ummi ta turo mana. Dama can
wanki yi mana ake yi, menene kuma ya rage,
saboda Allah. Gaba daya babbar ka'idar ba'a
son miji ya matsa min, yayanmu kuwa ba shi da
matsala, matansa 2 ne. To ki gaya min menene
bambancin zaman nan da gida? Ta sauke
numfashi ta ce,"Ni dai ina shawartar ki Antina,
ki yi zaman ki anan ba. Ta aje filet ta ce,"Sai ki
ban hujja. Idan kuwa babu, kin san Allah ba zan
sake kai wani sati anan ba. Sai na na san yadda
na yi na tsere." Ta tsura mata ido,babu alamar
wasa a zancan ta. Ina sauraron ki." Ta dan yi
jim, kafun ta ce,"Hujja ta daya ce, akan babbar
k'a'idar nan da ki ka fadi, gara a kiyaye, kin fa
san yau da gobe sai Allah. Ta harare ta,"Ban son
iskanci, ke zaman me ki ke yi,?" "Aure mana.
Amma ina gaya miki ki yi zaman ki anan, shine
rufin asirin mu, don Allah ki bar mu mu sami
Bebin goyo." "Lallai kin maida abin wasa, za ki
sha mamaki na." Ta ce,"To Anti ba sai ana son
mutum ake kula shi ba? Ke ba za ki gane ba
Anti, amma ina gaya miki, ki yi hakuri, saura
'yan watannin kadan ne." Gaba daya zuciyarta
ta girgiza, domin nan take ta gane abinda
Nusaiba ke nufi, sai dai a fuska bata nuna mata
ba, kara maka mata harara tayi,"Ba ki da hujja
amarya, so ku ke kawai ku azabtar da ni da
zama waje daya kamar 'yar gidan yari ." Ta
kamo hannun ta, tana 'yar dariya,"Antina
kenan, Allah ya bar min ke. Ai shikenan, an
wuce wurin ko? Ta ce,"Ya zan yi?" Tunda haka
ku ka fi so. Ta mike ta dawo gefen gadon, ta
dan rungumota,"Da me da me zan kawo miki
gobe?" Ta ce,"Za6in ki, za6i na ne amarya. Ki
kawo komai, zan ci. Yanzu za ki tafi? Ta duba
agogo, sai zuwa 3 da rabi. Ta ce,"To kin ga idan
za ki tafi ko ki rage kayan wajen nan sunyi yawa,
ki bar min kwandon wanka da na burosh
kawai.Wadannan zannuwan duk ki koma da su,
gobe a kawo min wasu." Ta ce,"An gama
Antina." Suka ci gaba da hira har zuwa 3 da
rabi. Nusaiba ta kwashe kaya, kamar yadda
Zarah ta ce. Tun da Nusaiba ta tafi. Zarah ke
zaune bisa sallaya, 6acin rai cunkushe cikin
zuciyar ta, bata san lokacin da hawaye ke satata
ba, Sabida tsabar tausayi da takaici. Tana ganin
wayar Naseer na ta kururuwa. Amma ta ki
dauka, yayi kira ya fi sau 5, sannan ya aiko
sako, shi ma bata bude ba, balle ta san me ke
ciki.
~~~~~~~~~~~~~~~~~~~~~~~~
Karfe 8 bayan sallar isha'i, Zara ta had'a 'yan
abubuwan da suka rage, cikin jakar hannun ta,
ta faki idon kowa, ta fiyo a hankali ta bar
asibitin. Aca6a, ta haye ya aje ta gida. Bata yi
sallama ba, har ta shigo cikin gida. Umma na
can ciki tana sallah. Abba kuwa bai dawo daga
masallaci ba. Don haka ta wuce da sauri sasan
su, ta tura falon ta shiga. Shirin na ta gwanain
sa'a, domin Nusaiba na can bayainta tana
wanka. Saboda haka ta wuce dakin ta. A rufe
yake, amma ba da makulli ba, tayi hamdala ta
shige, ta mayar a hankali ta rufe. Ta aje jaka ta
koma gado ya kwanta don hutawa, don bin
dokar likita. Naseer bai shigo Zaria ba, sai tara
saura kwata, kai tsaye asibiti ya wuce don ganin
Zarah tare da neman sanin dalilin rashin daukar
wayar sa.Kowa na bisa gado, amma gadon
Zarah babu kowa. Ya tambaya. Suka ce su ma
ba su ganta ba, babu ma wanda ya san lokaci
da ta bar asibitin. Hankalin Naseer in yayi dubu,
ya tashi, ya bude wa Nosis wuta masifa yake
kamar ransa zai fita. Da kyar suka samu ya
sassauto ya saurare su. A inda suka shawarce
shi da ya je gida ya duba, tunda ga shi babu
kayanta ko daya sai 'yar karamar kular abinci
kan dirowa. A fusace ya fice asibitin baya ko
ganin titi sosai, saboda tsabar fushi. Lokacin
daya shigo gida karfe goma saura 'yan mintoci
ne, su Umma har sun rufe sasan su, wucewa
kawai yayi ya fado falon. Nusaiba ma ta jima da
rufe dakin ta. Sai dai ba barci take yi ba
tunanin duniya ya ishe ta, tare da juyayin irin
yanayin da ta tsinci kanta, wanda a kodayaushe
take aje shi a matsayin kaddara daga Allah.
Kofar dakin Zarah ya wangame, cikin zafi da
fushi. Kwance ya ganta ba kuma barci take yi
ba, domin idanunwanta ya fara arba da su. Bai
rufe kofar ba, ya wuce da sauri yana fadin."
Zarah kin kuwa san abinda ki ke yi? Don me za
ki baro asibiti, ba tare da izinin kowa ba? Ta
dauke kan ta, tayi banza da shi har zai ga zama
bakin gadon." Ba za ki yo magana ba?" Shi yasa
na ke ta kiran wayar ki, ki ka ki dauka? To kar ki
ji da wai, yanzun nan za ki koma asibitin, tashi-
tashi! Kar ki 6ata min lokaci." Ta dube shi, ido
fal da hawaye ta ce,"Ba zan koma ba yayana."
Ta yunkura ta tashi zaune, yayin da ya saki baki
yana al'ajabinta, "Ba za ki koma ba? Ta
ce,"Kwarai ba zan koma ba Ai ban san rashin
adalcin ka har ya kai haka ba yayana. Don me?
Saboda me? Ka na cutar da 'yar mutane ka na
so ka ci wutar Allah ne? Hawaye suka soma
zuba. Ya ce,"Nusaiba ba matar ka ba ce? Don
me za ka aje ta shekara daya da rabi, ka na
cutar da ita? Kuma tana kallo na, tana sane da
abinda ke Faruwa. Wannan zalunci ne. Allah ba
zai bar ka ba yayana, gara ka san halin da ka ke
ciki, ka gaggauta yin gyara........... Ya daka mata
tsawa wacce ta kara jawo hankalin Nusaiba da
tuntuni take jin 'yan surutan da bata gane daha
inda suka fitowa ba, don haka ta taso a hankali
ta fito. "Ya isa Zarah! Ya isa! Dama saboda
wannan maganan ki ka baro asibitin ba izini? To
ina son ki sani, babu ruwanki a ciki wannan
maganar, ban kuma ce ki sa kanki a ciki ba,
zamanta daban, zaman ki daban, kar ki sake
yimin wannan maganar." Tayi zuciya sosai,
idanuwan ta suka kara yo waje, ta ce,"Kwarai
akwai ruwa na a ciki domin ni ban dauki
Nusaiba a matsayin kishiya ba, 'yar uwa ta ce,
kuma ina kaunar ta tsakani da Allah. In don
akan wannan cikin yasa ka ke kumfar bakin,
don me na baro asibti, bari ka ga yadda za'ayi
da shi, tunda shi kadai ka ke so, ba ka tsoron
Allah." Tana fada ya ga ta mike bisa gado ta
hau buga tsalle sama tana direwa da karfin
tsiya, hawaye na zuba bakinta na fadin,"Ban son
shi, sai ya zube wallahi! Nusaiba ta kara
mannewa da bango, ta fasa kuka sosai, ciwon
zuciyar ta ya karu, har sai da ta sulale kasa. Da
kyar ta rarrafa ta koma dakinta. Nan bisa kafet
ta kife, tana rusar kuka, wanda ita kanta ba za
ta iya tantance dalilin yin sa ba,Illa iyaka ta san
ita abar tausayi ce, sai dai kuma ai bata
ratayawa ranta son Naseer ba, tana dai zaune
ne kawai, don farin cikin Abbanta kamar yadda
ta fahimta shi ma Naseer ya amshi auranta ne
saboda girman Abban na ta a idonsa. Amma da
ciwo, ka na zaman mu2m bai damu da shirgin
ka ba. Sai da yayi ta maza sosai, sannan ya
cukuikuyo Zarah yayi iya kokarinsa kafin ya
samu ya manna ta ajikin sa,"Kin yi hauka ne
Zarah?? Za ki kashe kan ki ne? Ta rushe da kuka
sosai, bai ta6a ganin tashin hankalin Zarah irin
na yau ba. Gaba daya jikin sa yayi sanyi,"Ki yi
shiru Zarah, na ce na ji, na yi laifi, zan gyara."
Ta sulale a hankali ta zauna, saboda yadda take
jin jikin ta ko'ina ya daddure. Ya biyo ta da
sauri, ya dago fuskarta,"Za ki takaita ni ne
Zarah? Don me za ki min haka? Murya na rawa
ta ce,"Dole in yi maka yayana. Domin rayuwar
ka na cikin hatsari, kai har da ni ma, tunda ta
gaya min na sani, hakki na ne in gaya ma ka
gaskiya. Zalunci babu kyau yayana, kar shaidan
ya kai ka ya baro, shi gaba daya mece ce
rayuwar? Ya tallafi kuncinta, ya goge
hawayenta." Duk na ji, na ce zan gyara. Amma
ita ma bai dace ta gaya miki ba, wannan rashin
kunya ne." Ta ce,"Tayi rashin kunyar. Ai ba
kanta tsaye ta gaya min ba. Magana mu ke akan
zamana asibitin, na ce ya ishe ni, zan dawo
gida, tunda tana nan za ta dauke min komai. Ka
ji abinda ya kawo maganar. A hakikanin gaskiya
ka cutar da........ Ya toshe bakinta,"Yi shiru, ya
isa haka. Na dauki kuskure na, shi kenan? Saura
gyara." "Ai zan gyara. Yanzu da ki ka baro asibiti
me su Umma suka ce? Ta ce,"Ni ba wanda ya
san na shigo gidan nan, har ita amarya." Ya
ce,"To ki taso bakin ki alaikum in maida ki."
"Muryar Umma ya jiyo tana kwala ,"Naseer!
Naseer!! Ya runtse ido, "Shi ke nan ga Umma
can ta fito." Ya mike yana amsawa ya fito. Tana
tsaye kofar falo. "Hayaniya na ke ji, wai me ke
faruwa? Ya rasa me zai ce, sai kawi ya
ce,"Umma Zarah ce ta gudo daga asibiti."
Zarah? Ta fada cikin al'ajabi. "Ina take? Ga ta
nan cikin daki, na yi na yi ta zo mu koma ta
ki."Jin muryar Ummar yasa Nusaiba ta buda
kofa ta fito. Tare suka cusa kai dakin, tana
zaune tana faman share kwalla. Nusaiba ta ruga
ta rungume ta,"Antina, me yasa? Ganin Zarah
na kuka, ita ma na ta ya dawo. Umma ta
ce,"Amma dai Zarah ba ki da hankali, ki na
wasa da lafiyar ki ko? Maza mike ku koma, kafin
in kira Abbanku, ba na son jin wata magana."
Nusaiba ta sake ta, ta kamo hannayenta,"Tashi
Antina mu je a maida ke." Ta mike Umma na
fadin"Nemo mata hijabi." Kafin Nusaiba ta
dauko hijabin, jini ya malalo har bisa diddigen
ta. A hankali ta yaye zane ta duba, ido waje ta
kalli Umma. Wasu hawayen suka tsirgo. "Umma
duba ki gani." Ta hau salati da tafa hannu.
Naseer ya rude,"Kin ga irin ta ko? Kafin su yi
haka ya sunkuce ta yayi waje. Nusaiba ta biyo
su da gudu hijabi a hannu. Umma ta kwala wa
Abba kira ya fito a rude. A rudan take gaya
masa, ta fice da gudu. Kafin ya fito waje. Naseer
ya ja mota sun wuce, nan ya tsaya yana ta
sababi shi kadai. Da ka gan su ka san a rikice
suke gaba dayan su, babu mai takalmi balle
mayafi. Zarah ta sha fada wajen Likita da Nosis.
Suka yi mata allura maimakon jini ya tsaya, sai
ciwon mara kamar za ta wuce barzahu.Dole a
kwance mahaifa. Haka Likita ya gaya wa su
Naseer. Zufa ta keto masa, babu abinda zai iya
yi, tunda hakan shi ne samun lafiyar ta. In anyi
sa'a a sami dan.Komai na Allah ne, haka nan
suka fauwala wa Allah. Ana kwala kiran sallah ta
haiho dan ta namiji. Sai dai yayi k'ank'anta.
sosai. Naseer yayi kamar zai rasu, don murna,
haka Nusaiba ke sauke numfashi tana kokarin
dai-daita shi. Ba su ga Yaron ba, saboda an
hanzarta sa shi a kwalba. Bayan an kintsa
Zarah, an fito da ita dakin hutu, can suka kutsa
kai suna rige-rigen gaishe ta. Minti 15 bayan
fiddo ta. Naseer ya koma da Umma gida, don
kwaso kaya da dukkan abinda ya dace. Nan
suka bar su tare da Nusaiba, duk doki ya ishe
ta, ta kosa ta ga Baby. Tare suka dawo da Inna.
Daga bisani ne su Abba da Malam Umar suka zo
asibitin, suka duba Zarah! Zarah kam ta sha
fada wajen iyayenta akan baro asibiti da tayi. Ta
amsa laifin ta, ta kuma bada hak'uri saboda
bata son kowa yasan dalilin barinta assibiti.
Babu wanda ya ga Baby, domin likita ya hana,
ya ce sai karfe 6 yamma za'a fito da shi, idan ya
sha nono a maida shi.Ai kuwa Umma sai da ta
jira lokacin yayi. Wata Nos ta fito da shi don
koridon dakin aje jarirai wanda shi ma a rufe
yake ruf. Kai! Wannan Yaro Allah ya zuba halitta
mai kyau a wurin nan. Tamkar Naseer yayi kaki,
kamanin su daya, amma ya zarce Naseer kyau,
nesa ba kusa ba. Tun da yayi arba da Baben
nan, jikinsa ya dauki rawa, ya ji gaba daya
duniya, babu abinda yake so fiye da Bebin. Da
haka Nusaiba ta tsinci kaunar Bebin nan cikin
ranta, kamar ta gudu da shi. Amma ina. , Minti
30 aka ba su, su gan shi, lokacin na cika, da
kyar Nos ta kar6e shi hannun Naseer, ta koma
da shi. A ranar Abba ya rada wa Yari sunan sa
watau Iliyas!.
~~~~~~~~~~~~~~~~~~~~~~~~~~~~~~
Satinsu 3 a asibiti sai dai Zara ta zo gida tayi
wanka ta koma. Babu wanda bai zo ganin su a
asibitin ba, hatta Fa'iza. Sageer ya kawo ta, ta
gaida Zarah. Haka Kausar bata yi kasa a guiwa
ba ta zo, ta kuma ce za ta dawowa ranar da aka
tsaida shagalin suna. Cikin wayoyin Naseer
hotunan Iliyar (Ameer) ne birjik iri-iri. Babu
yadda za'ayi ya wuce awa, bai bude ya gan shi
ba, kwarai ya kwallafa Yaron nan cikin ran sa,
kamar shi kadai ya fara yin Da.Sun shafe sati 3n
nan cif! Sannan aka sallami Bebi. Nusaiba na
son ta rike shi a mota, amma ubansa yayi kane-
kane. Sageer na tuki, yana masa tsiya, ganin
yadda yake ta kara rurrufe shi da shawaul, don
Likita ya ce kullum ya kasance a lullu6e. Ranar
da ta zagayo, aka shirya gagarumin shahalin
suna. Nusaiba ta kashe kudi, abubuwa kala-kala
tayi na ci da na rabo, balle uban gayya. Ko
lokacin bikinsa bai saki jiki da aljihu irin na
wannan yaron ba. Mai-jego kuwa ta kwashi kaya
akwatuna 2 manya. Nusaina ta shirya kayan
Bebi da zannuwan Mai-jego. Banda wasu
tarkace cikin (Ghana most go). Bayan kowa ya
watse. Nusaiba da Naseer na zaune suna kallon
yadda Umma ke wanke Bebi da ruwan zafi,
yayin da Zarah ke bayinta tana na ta wankan.
Nusaiba ta dube ta, ta ce,"Ni kuwa Umma in ki
na wankan nan, sai in ta mamaki." Mamakin
me? Ta ce,"Ni gani na ke kamar zai sumbule, ke
kuwa ki na tayi masa, ba kya jin komai." "Dariya
Umma tayi. "Nusabai oho! Ka ji Naseer, ashe in
ta haifi na ta, ba za ta iya wanke shi ba." Tare
suka kalli juna da Naseer, yayi yaken dole, ita
kuwa kunya ce ta rufe ta, ta mike za ta wuce,
ya ce,"Ina za ki kuma? Ba ke ki ka dauko zancan
ba?Tsoma bakin sa yasa ta k'ara azama ta bar
dakin. Umma na dariya. Naseer na murmushi,
yana fad'a a ran sa, "Yarinya sai salon
tsiya."Umma ta nade Yaro a tawul mai laushin
gaske, tana fadin,"Ita ma Allah ya kawo masu
albarka." Ya shafa k'eya ya ce,"Umma hanzarta
ki sa masa kaya akwai iska. Ta zubo masa ido ta
ce,"Na k'i, ka fi ni son shi ne? Ya kada kai yana
murmushi,"Tuba na ke UmmaTa." Yana rufe
baki. Abba yayi kiran sa, ya tashi ya fice. Abban
na falon sa a zaune bisa kafet, shi yasa yana
zuwa ya tamkwashe kafa gaban sa, ya ce,"Ga ni
Abba.." Ya dube shi da kyau ya ce,"Na yi maka
zuru in ga irin hankalin ka, sai na lura lallai ba
ka da hankalin." Gabansa ya fad'i, ya k'ara
matsowa ya ce, "Me na yi Abba? Ya ce,"Maganar
komawa Hanwa, na ji ko tada zancan ba ka yi,
me ka ke nufi? Ya dan sunkuar da kai, ya sauke
numfashi,"Yaya mu2m zai ba ka gida, amma ka
ki zama? Saboda 6arayi sun shiga ma sau 1?
Anji ba ka da lafiya wancan karon, har yanzu ba
ka warken bane? Yayi dan shiru kafin ya
ce,"Abba ba haka ba ne. Ni kai na ina son
komawa can, amma da zarar na tuna da irin
dukan da na sha wajen 6arayin nan, ni kan ji
tsoro ya kama ni. Kar ka damu Abba za mu
koma."Ya ce,"To ka hanzarta sa ranar, ku koma.
Na san Alhj na da kawaici, ba zai ce komai ba.
Amma babu dadi mu2m yayi ma ka kyauta, ya
ga ka na yi wa abin rikon sakainar kashi, ko kai
ne ranka ba zai maka dadi ba." Ya ce,"Haka ne,
insha-Allahu zan san yadda za'a yi." Yauwa sai
ka yi wa Allah godiya kawai kan matanka a hade
yake, asirinka ya rufu dari bisa dari, domin
zaman lafiyar iyali a cikin gida, shine kwanciyar
hankalin Mai-gida." Ga su dai yara k'anana,
amma Allah yayi masu kaifin hankali, shi yasa a
kodayaushe na ke k'ara jawo hankalinka a kan
kamanta adalci tsakaninsu. Ba cuta ba
cutarwa,Naseer wannan shine tsoron Allah, ka
sani zai tsaida ku ranar da ni da Umman ka ba
za mu iya cetonka ba. Ina fatan ka ji ni da
kyau? Ya numfasa sosai, ya ce,"Na ji Abba, na
gode." Ya ce,"Ita kenan maganar, je ka wajen
iyalinka." Ya mike jiki babu kwari, ya fito kai
tsaye dakin sa ya wuce, bisa gado ya kwanta
rigingine. Tunani ya addabe shi, ya rasa ta inda
zai 6ullowa al'amarin. Sati 4 kenan da suka yi
sa'insa da Zarah akan Nusaiba, sam ya rasa ta
yadda zai fuskance ta, domin shi mu2m ne mai
tsananin son ra'ayin sa. A JININSA YAKE!." Idan
ya so abu, ya so shi har abada, inda ya kyama
ce shi baya waiwayar sa balle ya daga masa
hankalli Sai dai a yau Abbansa yayi maganar da
za ta sa dole ya waiwayi abinda ba shi cikin
tsarin sa, wanda a da yake ganin sai dai rai yai
halin sa ko in ta gaji, ta nema wa kan ta mafita.
Ya tashi zaune yayi wawan ajiyar zuciya, ya dubi
agogon hannun sa karfe 9 na dare. Ya diro daha
gado, ya fice ya dauki mota iya bar gidan.
Kwana 2 tsakani. Ya kama ranar juma'a.
Wannan rana za ta iya zama daya daga cikin
ranakun tarihin rayuwar Nusaiba. Shigowar ta
daki kenan, sun gama shan hirar su da Antinta,
misalin karfe 10:30 na dare. Ta yi shirin barci ta
haye gado, ta jawo littafin turanci (Novel), ta
fara karantawa, don kauda tunani, kafin zuwan
barci. Bata wani jima ba, ta ji an dan
kwankwasa kofar ta, ta aje littafin ta taso ta sa
makulli ta bude. Sai da gaban ta ya fadi, saboda
wanda ta gani tsaye a kofar dakin ta. Ido waje
take kallon sa, shi kuwa bai saurari komai ba, ya
wuce ciki, hannun sa dauke da lemun
gwangwanin. (Coke). Tsakar daki ta iske shi, ta
nemi gefen gado ta zauna tana mai tsananin
mamaki. Lemun hannun sa ya miko mata. Ya
ce,"Ki sha yanzu." Ta kar6a ta duba, bakin
gwangwanin a bude yake, ta sake kallon sa,
bata iya cewa komai ba. Ya zura hannaye aljihu
ya ce,"Ko ba za ki sha ba? Ta gyada kai, ta
ce,"Zan sha mana." Ya ce,"To ki shanye, kin ji?
Ta amsa da kai. Ya juya yayi waje. Ta bi shi da
kallo, sannan ta juya bisa lemu, ta tsura masa
ido,"Menene dalilin bani lemu in sha da tsohon
dare? Kashe ni kuma yau zai yi? Gara ya kashe
ni ma kowa ya huta, shi kenan an raba
gardama." Kwalla suka tsatso mata, ta goge su.
Kan ta tsaye ta kafa gwangwanin lemu ta yi sha,
har ya kare. Tayi zuru gefen gado tana jiran
abinda zai biyo baya. "Yan mintoci kadan ta fara
hamma, idanuwanya su ka yi nauyi. Kafin ayi
haka, ta rasa duniyar da take, nan ta wuce
lauuuuu........bisa shimfida warwas! Minto 10
tsakani ya dawo dakin, ya zura mata ido. Sai
kuma ya ji tausayinta ya kama shi. "Tabbas
kwayoyin nan sun fi karfin jininta ga shi yayi
mata (Over dose)." Ya gyara mata kwanciya, ya
dafa goshin ta yayi addu'a. K'arfe shida na
safiya, ya shigo dakin Zarah rike da carbin sa,
yana ja. Ko gaisawa ba su yi ba, ta ce,"Ban ga
amarya ba, bari in duba ta." Ya ce,"Barci take
yi, tunda ta tashi tayi sallah, ta zube kamar
matacciya." Wayyo, gajiya ce, bari in kyale ta, ta
huta baiwar Allah. Tun da ka yi haihuwar nan
bata yi sukuni ba? Ya zauna kusa da ita ya
ce,"Ke ba kya gajiya da wasa amarya."Ta watso
masa harara ta ce,"Me ye na ka a ciki? Ya
langwabe kan sa a kafadar ta ya ce,"Babu komai
Antin amarya. Ni matsala ta na yi missing din ki
da yawa, yaya bayanin yake ne? Ta janye
kafadar ta, ta ce,"Koma dakin ka yanzun Umma
za ta kwaso ruwan wanka." Turo mata fuskar sa
yake yi kamar zai cinye ta, kawai muryar Umma
suka ji daf da kofar daki tana fadin,"Jama'a, wai
yau ina Nusaiba ne? Yayi zumbur ya suro Ameer
yana girgiza shi," Kai sarkin kuka ne ko? Ka
hana mutane barci da sassafe kuma ka tashi.
Dariya ta kullewa Zarah ciki, da kyar ta kirne ta
ba Umma amsa,"Barci take yi Umma." Ta
ce,"Allah sarki, gajiya ce, komai sa ta ce ita ce
za ta yi." Ta dire bahon wanka Zarah ta miko
mata kujera da kayan sabulu. Naseer ya miko
Bebi, sannan ya tsugunna ya gaishe ta, ya samu
ya sulale ya koma dakin sa. Agogo ya fara duba
wa kafe 7 sau kwata. Yayi kasake yana
tunani,"Kai 'yar mutane fa shiru? Ya tambayi
kan sa. Ya zubara ya fito. Kofar ya murda a
hankalu ya bude. Kwance ya hango ta yadda ya
bar ta, tun kiran sallar farko. Ya shigo ya maida
murfin a natse ya rufe. Ya matso ya shiga
bubbuga ta, "Ke! Tashi! Ba ki san gari ya waye
bane? shiru ka ke ji. Malam ya ci shirwa.Tsoro
ya fara kama shi, bai san lokcin daya haye
gadon ya tarairayi ta ba, ya dan bubbuga kuncin
ta,"Ke Nusaiba! Ke! Can cikin sambatu take ta
surutan da bai san abinda ta ke cewa ba. Tayi
lauuu.....ta fada bisa filo. Idon Naseer fa ya
raina fata. Bayi ya shige ya debo ruwa ya
tarairayo ta, yana shafe fuskarta, yana kira tare
da bubbuga kuncinta. Da kyar ya samu ta dan
budr ido jajur! Ta dube shi,"Ki tashi aka ce, gari
ya waye, kowa sai tambayarki yake yi." Ahaf,
ashe duk surutun banza yake yi, zurun da tayi
ma sa a cikin barci ne. A hankali ya ga idon ya
karasa rufewa. Ya dafe goshi, ya runtse ido, ya
ce,"Na shiga uku.!" Da ya rasa na yi, sai ya
gyara mata kwanciya, ya rufe ta ya bar dakin.
Mota ya dauka ya nufi gidan Yakubu ya dauki
doki ya bazama filin sukuwa yayi ta zagaye, ba
ji, ba gani, saboda damuwa. Ba shi yasan halin
da yake ciki ba, sai da ya ji shi cikin ciyayi yana
birgima. Yayi lamo kamar ya mutu. Wasu
mutane 2 suka dago shi suna tambaya,"Ba ka ji
ciwo ba? Ya mike ya na fadin,"Ban ji, ba na
gode." Ya kar6i akalar dokinsa a hannun su, ya
taka ya haye, nufi Tudun Jukun. Karfe 10 saura
kwata, yake fakin, ya shigo gidan yana fargabar
me zai shiga ya ji? Yana yin sallama kuwa.
Umma ta kwala masa kira. Ya nufi gunta
ajikinsa a sanyaye,"Ga ni Umma."Ta ce,"Nusaiba
barci har tara da rabi, da kyar muka tashe ta ni
da Zarah. Wane irin barci ne haka, yarinya bata
ko iya tsayuwa? Ya zaro ido, ya ce,"Ina take
yanzu? Ta ce,"Tana daki, ta ce kanta ma ciwo
yake yi, shine na ce ko asibiti za ka kai ta? Ya
wuce da sauri, yana shiga falo yayi karo da
Zarah ta fito kicin,"Yayanmu, barcin amarya yau
ya ba mu tsoro, kamar wacce ta sha wani abu?
Tana nan kai na faman ciwo." Tana daki ne?
Tana nan akwance." Ya wuce dakin, ya bude ya
shiga. Tana kwance Idanuwan ta rufe, ya tsaya
kan ta yayi kira,"Ke! Ki tashi aka ce a kai ki
asibiti." Ta bude ido jazur, ta dube shi, wani
sabon takaici ya lullube ta, hawaye suka cika
idanuwanta fal, ta ce,"Na sha magani, ya
daina." Umma ta ce,"A kai ki asibiti, ta so mu
tafi mana." Tayi shiru tunani ya rufe ta, bata
ta6a zaton Naseeer yana kin ta haka ba, sai
yanzu ta tabbatar da bata da makiyi kamar sa.
Shi yasa tunda ta wartsake, ta tantace halin da
take ciki, ita ma ta fara tsanar sa, irin wanda
bata ta6a ji ba. Tayi kuka cikin bayi, ta kuma
roki Allah yayi mata sakayya, idan har akwai
cutarwa a cikin abinda Naseer ya yai mata. Yayi
sauri ya kauda kai, jikinsa ya k'ara la'asar. Ya
kama hanya da sauri zai bar dakin. Zarah ta
kawo kai." Asibitin za ku? Ya ce," Ta ce bata
zuwa." Saboda me? Ta wuce gun ta, "Amarya!
Me yasa? Ta goge kwalla ta ce,"Na sha Panadol
Antina." Ta ce,"Ai yanayin barcin da ki ka yi ba'a
gane masa ba, shi yasa Umma ta ce ki zo a kai
ki."Tayi shiru bata da niyyar tashi. Can ta jiyo
muryar Umma,"Ina Nusaibar? Nan da nan ta
sakko daga gado, ko kafin Umma ta karaso cikin
dakin, ta dauko hijabi. Ya ce,"Kin ce ba za ki
ba?" Za ni Umma, hijabi zan sa." To ki je yana
jiran ki a mota." Suka fito Zara ta rako ta bakin
kofar gida. Ta shiga mota. Suka tafi, babu mai yi
wa wani magana. Sun iso cikin asibitin. Nusaiba
fa ta kafe ta ki fitowa daga mota. Yadda bai ce
mata fito ba, haka ita ma bata motsa ba daga
inda ta ke zaune ba. Haushi ya kume shi, yana
ganin kamar tana son ya rarrashe ta ne." "Lallai
yarinyar nan ta raina ni." Hannu yasa ya zaro
wayarsa, ya danna (Ear piece) yana jin gindan
Rediyon (Queen FM). Ga hotunan Ameer yana
kallo hankalin sa kwance. Kusan minti 30 suna
zaune, ita ji take kamar ta fice daga motar tayi
tsuntsuwa ta ganta gidan iyayen ta. Da ya ga
abin na ta da gaske ne, sai ta buga tsaki. Shi
take 6ata wa lokac, sai ya buga tsaki yayi wa
mota key, ya figeta a guje. Yana yin fakin kofar
gida, ta bude ta fito ta shige cikin gida. Ya bi ta
da kallo, kafin ya ce aran sa,"Duk su Zarah su ja
siyo min raini." Yayi tsaki ya fito ya shiga ciki.
Suna tare da su Umma suna tambayar ta yadda
aka yi? Yana isowa, tana fadin,"Babu komai
Umma, dama maganin barci na sha, don un
sami barci, ashe ya fi k'arfin jini na, amma
Likita ya ce ba komai zai sake ni." Umma ta
ce,"Ai shi ke nan, sai ku kiyaye shan
maganunguna haka kawai. Don Allah kar ki
sake, kin ji? Ta ce,"To Umma." Yinin nan guda,
bata iya cin abincin kirki ba. Saboda tsabar
tunanin kaddarar da Allah ya sauko mata.
Washegari ta tambaye shi zuwa Kaduna.." A
dawo lafiya." Ya ce da ita. Da kan ta ta tuka
motar ta tafi.."Can ta wuni tare da Umman ta,
suna hira ta ji dan sanyi a ranta. Kamar kar ta
dawo ta rink'a ji, shi yasa ta rink'a nuk'u-nuk'u.
Yamma tayi sosai. Abban ta kuwa ya ce ba za ta
kwanan ba. Direba yasa, ya ja mata motar ya
dawo da ita. Shi ya koma a ta haya.
~~~~~~~~~~~~~~~~~~~~~~~~~~~~~~ Sannu a
hankali Zarah tayi arba in. Kodayaushe Ameer
na wajen Nusaiba, ita ke masa komai, ta shaku
da shi sosai, kuma tana son Yaron, duk da irin
cin kashin da Baban sa yake mata. Wanda har
yanzu abinda yai mata, yana cikin ranta. Ta sa
ido ta ga ko zai sake kwantawa, amma baiyi
gigin k'arawa ba, saboda shima al'amarin ya
dan sanya shi nadama, bata dai isa ya nuna
mata ba, balle ya bada hakuri. Saboda haka
suka ci gaba da zaman da suka saba tuntuni.
Kwanan Ameer 50 dai-dai, yayi wayo ya kumua
shiga ran kowa. Da asuba Zarah ta farka tana
mamakin irin barcin da tayi. Lallai Ameer ya sha
kuka, bata ji ba. Domin tayi tunanin tun lokacin
da ta bashi nono take barci. Tausayin shi ya
kamata, ta tashi ta dauki shi. Kara bude ido tayi
sosai, don sai taga kamar. Gaba daya jikin sa ya
sandare Tsoro ya kamata, jikinta ya dauki rawa
ta dan girgiza shi, ina rai ya riga yayi halinsa, da
sauri ta diro daga gado tare da shi ta nufi kofar
dakin Naseer ta bubbuga, ya fito ya bude mata.
"Duba Yaron nan ka gani ko motsi ba yayi.
"Inna-lillahi"wa-Inna-ilaihir-raji'un! Haka yake ta
faman fadi yana girgiza shi. Tuni Nusaiba ta ji,
sai ga ta a gigice. Naseer yayi waje da shi, suka
biyo bayan sa, suka dunguma sasan su Umma.




Zaharaddeen Shomar
Whatsapp  08168575100




Ajininsa yake 2-04
Posted by ANaM Dorayi on 08:19 PM, 20-Nov-15
Under: Ajininsa yake
_______ NA ZULAIHAT SANI KAGARA_______
Abba ya kar6e shi, ya rungume a jikin sa ya
ce,"Ku yi hakuri. Allah ya kar6i abin sa."
Nusaiba ta sulale nan hawaye suka tsinke mata.
Zarah kuwa dakin ta ta koma ta zauna bakin
gado tana sallallami. Shi kuwa Naseer kafewa
yayi kai da fata aje asibiti a duba masa Yaro,
k'ila suma yayi. Ya dube shi ya ce,"Hakuri fa za
ku yi Naseer, wannan yaron ya riga ya rasu,
babu abinda za'a iya yi masa. Kujera ya zauna
dabbas! Idanuwansa suka bushe kamas! Kirjinsa
na bugawa.
Abba ne ya iya gayawa duk wanda ya kamata
ya sani. Nan da nan jama'a suka taru. Umma
tayi masa wanka, aka shirya shi, cikin likafanin
sa, suka sallace shi, aka wuce da shi makabarta.
Naseer bai iya zuwa ba, saboda ba zai iya
jurewa ba, yana kallo a cusa masa Ameer cikin
rami. Yana zaune kai cikin guiwa a falon Abba,
ya rasa abinda ke masa dadi a duniya. Ji yayi an
dafa kansa, ya dago a natse, yadda ya bi wanda
ya dafa shi. Alh.Basheer ne a gabansa, yayi
mamakin da bai ji sallamar su ba. Ya mike yana
masa sannu da zuwa, ya amsa, ya ci gaba da
fadin." "Zauna ka ji?" Suka zauna tare, ya gaishe
shi. Bayan yayi masa gaisuwa, ya ce, "Umman
ku ta ce an je kai shi ko? Ya ce,"Sun tafi tun
dazu." Ya ce,"Allah ya kara mana hakurin rashin
sa. Tare muke da Ummin Nusaiba, tana can
sasan wajen Umma." Ya ce,"Bari in je mu gaisa."
Ya mike ya fice. Alhj na masa kallon tausayi.
"Yan mintoci kadan ya dawo, ya sake zama. Bai
iya cewa k'ala ba, har zuwa wani lokaci, kafin
Alhj ya katse shirun,"Naseer! Ya dan dube shi ya
amsa. Ya ce,"Don Allah ka daina yawan tunani,
komai ya sami bawa da izinin Allah. Ba kai kadai
ba ne, Ubangiji na jarabtar bayin sa da masifu
iri daban-daban. Amma idan bawa yai hakuri,
ya jure komai wucewa yake yi, tamkar bai ta6a
faruwa ba. Abinda na ke son ka da shi shine. Ka
k'ara yawaita sadaka da addu'a, domin ita
sadaka tana yaye masifa da damuwa. Sai kuma
hamdala ga Allah. Ko wane yanayi ka tsinci kan
ka, to ka gode wa Allah. Ubangiji na wadata mai
yawan yi masa godiya. Ba wadatar kudi kawai
na ke nufi ba, har da wadatar zucci. Ka sani
idan zuciya ta wadatu da imani, duk abinda zai
zi wa bawa, zai kasance mai mika wuya ga
Allah. Kar ka damu, ka ji? Ya sauke numfashi ya
gyada kai, ya ce,"Na gode." Sun jima. Alhj
Basheer na yi masa nasihohi kafin su Malam
Balarabe da sauran jama'a suka dawo daga
makabarta. Nan ya bar su ya fita,Suka yi
sallama da jama'a, yayi masu godiya kowa ya
kama gaban sa. Aka bar su su 2 da Sageer.
A hakikanin gaskiya Alh.Basheer na son Naseer,
shi yasa duk ya damu da irin halin damuwar da
ya shiga, tunda yayi aure. Yau wannan, gobe
wancan. Shi kuma Naseer na masa kallon duk
matsatsin daya shiga. Alhj ne sila, don haka
babu wani dadin bakin da zai masa. Ya fadi,
kunni yaji, amma aiki da shi ba zai ta6a zama
dole ba. Naseer kenan.
~~~~~~~~~~~~~~~~~~~~~~~~~~~~~~
Wata 2 da rashin Ameer. Bikin Sageer da Fa'iza
ya rage saura sati 2, ka na Kausar tsakanin su
sati 1. Watau na sati 3 ya rage. Angwaye da
amare na ta fafutikar shirye-shiryen biki, ita
kuwa Nusaiba wani abu ke daure mata kai, mai
kama da al'amara. Al'adar ta d'if, ta dauke
wata 2 kenan. Ana neman a shiga na uku. Ga
wani ciwon kan safe da take fama da shi, yawan
kasala da taruwar miyau a bakin ta. Bata gane
kan gadon ta ba, ko alama sai dai bata fidda
shakkun ciki take dauke da shi. Ta runtse idonta
tamau? Ta dauki salatin Manzo ta yi wa Allah
tasbihi mai yin yadda ya so." Watau rabon Da,
ya kawo ni cikin gidan nan kenan? Ta dan yi
murmushi, domin take nan ta tsinci soyayar
abinda ke cikin ta.Tana so ta nuna wa Antin ta
alamomin da za ta gane, amma tana jin tsorin
kar Naseer ya sani. Watakila ba zai so haihuwa
da ita ba, tunda baya sonta. Kar ya munafunce
ta da wani abin, ya zubar da cikin. Saboda haka
ta ci gaba da 6oye yanayin ta, babu wanda ya
fahimce ta, illa tsiyar k'iba da Antin na ta
kullum take yi mata. A haka suka sha bikin
Sageer. Amarya ta tare kusa da gidan su Sageer
din, ya kama hayar gida karami dakuna 2, kicin
da bayi. Sageer ya kama angwanci, babu kama
hannun Yaro. Sati da ya zagayo tun ranar
alhamis Nusaiba na Kaduna, ko dama duk ta
kosa ta sami 'yar damar da za ta gida, ta dan
kwana 2. Tana like jikin Umminta, dadi ya ishe
ta, ga madarar Holandia mai sanyi take ta
faman sha, tun isowar ta. Haka Ummi ke cikin
farin ciki ganin yadda Nusaiba tayi k'iba, ta
k'ara haske sosai. Tana ta kallon ta, tare da lura
da yanayin ta, ita kuwa Nusaiba ta k'i yarda
wani abu yanke a bakin ta, kar miyau ya taru,
kamar dai yadda take yi a gida Zariya. Bikin
Kausar yayi armashi kwarai da gaske, angonta
Injiniya Abdul-Malik yayi bajinta. Haifaffen
Unguwar Sarki, amma yana aiki da hukumar
gida da ke Lagos.Ta tare a makeken gidan sa da
ke (Abuja Road) kafin lokacin da za su d'aga
Lagos. Ranar asabar Zarah ta zo, kuma ta so
kwana. Kiri-kiri Naseer ya hana, ya kasa, ya
tsaye da yamma dole ta biyo shi, ya dawo da
ita. Nusaiba kuwa sai da ta kai litinin.
Alh.Basheer yayi ta ciwon baki, yana wa Ummi
fada yana ganin kamar da hadin bakin ta
Nusaiba ta kai Mondy. Karfe 4 kayanta an gama
kintsa su a mota. Direba zai maida ta. Tayi tsaye
tsakar falo tana kallon iyayen ta, kamar kar ta
tafi. Hawaye ya gangaro kafadarta,"Kuka za ki yi
shagwa6a66iya? Ta tsura masa ido, hawayen
suka zubo shar-shar! Yasa hannu ya goge su, ya
sake cewa,"Menene abin kuka? Kin ga kama
hanya ku tafi. Allah ya kiyaye hanya. Ki kula da
kanki da kyau. Kin ji? Ga katon 4 nan na
Holandia, na ce a sa miki a but." Umminki ta
ce,"Yanzu shan ta ki ke yi sosai ko? Ta dan
sadda kai kasa. Yayi murmushi, ya dago
ha6arta,"Haka Umminki ga gaya min, ga ta dai
a tsaye, ko ba ke ki ka gaya min ba? Ta wuce
shi da gudu ta koma gun Ummi, rungume ta. Ya
ce,"Ummita, sai mun yi waya." Kafin ta ce wani
abu, ta bar wajen da gudu, ta fita. Me za su yi,
ba dariya ba, kamar almara ta ga Naseer na
fakin a harabar aje motici. Ta ja tsaya, tana
kallon sa. Mamaki ya ishe ta. Daga bayan ta, ta
ji muryar Abbanta na fadin , "Ah , ga ma mijinta
nan ya zo." Ya zo ya wuce ta, ya nufi wajen
Naseer da ke fitowa daga mota. Da sauri ya
tsugunna. Alhj ya mika masa hannu tare da
sallama. Ya mika na sa yana amsawa. Sannan
suka gaisa, kafin Alhj ya ce,"Ashe za ka sami
zuwa? Ai tun jiya na tambaye ta, ta ce min ka
na da.(Exams), ba za ka zo ba." Kan sa tsaye ya
ce,"Mun fito da wuri, shi ne na ce bari in zo
kawai in dauke ta." "Yayi kyau. Dama fitowar na
ta kenan zu su tafi. Bari direba ya kwashe
kayan, ya mayar but din ka." Ya bude but din.
Direba na juye kaya, shi kuma ya shige cikin
gidan, don gaisawa da Ummi. Ko dama Nusaiba
tuni ta koma ciki, kan ta daure, tana tambayar
kan ta." Wai ashe maza ma sun iya kisisina?
Kurame sak! Suka zama cikin mota, yadda ya
like kunnensa da Ear piece haka ta manne na ta
da sauraren tafisr din Marigayi Sheik Jafar
Mahmud Adam Kano.
(Allah yajikan Mallam Ja'afar na Gadon kaya me
Ahlussuna, tare da iyayenmu baki daya




Zaharaddeen  Shomar
Whatsapp   08168575100